Azərbaycan, Bakı, 28 sentyabr /Trend, müxbir A.Tağıyeva/
Bu gün səhər Suriyanın Hums şəhərində nüvə texnologiyaları üzrə mühədis, alim Aus Əbdülkərim naməlum şəxslər tərəfindən öldürülüb. Trend-in məlumatına görə, bu barədə "əl-Ərəbiyyə" telekanalı Suriyadakı insan hüquqlarının müdafiəsi mərkəzinə istinadən xəbər verir.
Mərkəzin məlumatına görə, bir qədər əvvəl Hums Universitetinin kimya və mühəndislik fakültələrinin professoru da qətlə yetirilib.
Alim Prezident Bəşşar əl-Əsədə qarşı nümayişlərin fəal iştirakçısı olub.
Suriyada kütləvi etiraz aksiyaları martın ortalarından ölkənin cənubundakı Dəra şəhərindən başlayıb, daha sonra isə ölkənin digər regionlarını əhatə edib. BMT-nin məlumatına görə, toqquşma qurbanlarının sayı 2,7 min nəfəri ötüb. Suriya hakimiyyəti hər iki tərəfdən 1,4 min nəfərin həlak olduğunu bildirir.
Müxalifət Prezident Bəşşar əl-Əsədin istefasını və siyasi islahatların keçirilməsini tələb edir. Rejim əleyhdarları hakimiyyətə müxalif orqan kimi Milli Keçid Şurası (MKŞ) formalaşdırıblar.