Bakı. Trend:
Çin Xalq Respublikanın Dövlət Şurası aprelin 4-nün yeni koronavirus pandemiyası nəticəsində ölənlər və insanların həyatını xilas etmək üçün virusun qurbanı olan həkimlər ilə əlaqədar ümummilli matəm günü elan edilməsi barədə qərar qəbul edib.
Trend-in "TASS"a istinadən verdiyi xəbərə görə, bu barədə Çinin Mərkəzi Televiziyası məlumat yayıb.
Qərara əsasən, aprelin 4-ü ölkədə, o cümlədən xarici ölkələrdəki diplomatik missiyaların ərazisində bayraqlar endirilməlidir. Bütün əyləncə tədbirləri ləğv edilir. Yerli vaxtla saat 10:00-dan (06:00 GMT+4) bütün Çin üçdəqiqəlik sükutla ölənləri yad edəcək.
Qeyd edək ki, rəsmi məlumatlara əsasən, Çində koronavirusa yoluxanların sayı 81,5 mini, ölənlərin sayı isə 3,3 mini ötüb.