Bakı. Trend:
Türkiyə hərbçilərinin növbəti əməliyyatı zamanı ötən gecə 5 terrorçu zərərsizləşdirilib.
Trend xəbər verir ki, bunu Türkiyənin milli müdafiə naziri Hulusi Akar deyib.
Onun sözlərinə görə, son 3 gün ərzində İraq və Suriyada zərərsizləşdirilən terrorçuların ümumi sayı 13-ə çatıb.
Nazir vurğulayıb ki, Türkiyə ordusu əhalinin və dövlətin təhlükəsizliyini qorumaq üçün əlindən gələni edir.
"Biz bilirik ki, terrorçular sifarişlə hərəkət edirlər. Bu qanlı təşkilatlar sistemli şəkildə məhv etdiyimiz anti-Türkiyə qüvvələrinin əlində bir alətdir. Daxil olan məlumatlara görə, terrorçuların liderləri artıq öz "sifarişçilərinə" qurtuluş üçün yalvarırlar", - deyə H.Akar bildirib.
O xatırladıb ki, Türkiyə ordusu İraqın şimalında terrorçuların sığınacaqlarını məhv edir, həmçinin Suriyanın şimalında terrorçuların nəzarətində olan zona yaratmaq planlarını da puça çıxarıb.
"Terror bitməyib. Eyni əzmlə əməliyyatlarımızı davam etdirəcəyik", - deyə nazir əlavə edib.