Azərbaycan, Bakı, 16 mart /Trend/
Azərbaycan təmsilçisi Dilarə Kazımova "Eurovision 2014" mahnı müsabiqəsində "Start a Fire" mahnısı ilə çıxış edəcək.
Trend-in məlumatına görə, mayın 6-da Danimarkanın paytaxtı Kopenhagen şəhərində keçiriləcək birinci yarımfinalda D.Kazımova "B&W Hallerne" arenasında tamaşaçılar qarşısına məhz bu mahnı ilə çıxacaq.
Mahnısını güclü, eyni zamanda, həssas qadının etirafı kimi təsvir edən təmsilçimiz deyib: "Bu mahnı sadəcə məhəbbətdən deyil, həmçinin mərhəmət, insanlıq, qarşılıqlı hörmət və bəzən çox qəddar olan dünyada tənha olmağın səbəbləri barədədir".
"Start a Fire" mahnısı Yohan Kronland, Alessandr Quthardt və Stefan Örn tərəfindən yazılıb.
Qeyd edək ki, S.Örn "Eurovision 2011"-in qalib mahnısı "Running Scared"ın müəlliflərindəndir.