Azərbaycan, Bakı, 28 yanvar /Trend/
Küveytdə ərəb dilində Nizami Gəncəvinin həyat və yaradıcılığından bəhs edən kitabça çap edilib.
Azərbaycan Küveytdəki səfirliyindən Trend-ə verilən məlumata görə, bu ölkədə fəaliyyət göstərən "Vətənsevər" Dostluq Cəmiyyətinin təşəbbüsü ilə şair Şahin Musaoğlunun vətənpərvərlik ruhunda qələmə aldığı "İgid əsgər möhkəm dayan" şeirlər kitabı Azərbaycan səfirliyin əməkdaşı Babək Əhmədov tərəfindən ərəb dilinə tərcümə edilərək nəfis tərtibatla Küveytin məşhur "əl-Risalə" mətbəə evində çap edilib.
Həmçinin Azərbaycanın Küveyt Dövlətindəki səfirliyi tərəfindən Nizami Gəncəvinin 870 illik yubileyi münasibətilə keçirilən silsilə tədbirlərə əlavə olaraq dahi şairin həyat və yaradıcılığından bəhs edən ərəb dilində, rəngli və nəfis tərtibatlı kitabça hazırlanaraq Küveytin məşhur "əl-Risalə" mətbəə evində çap edilib.
