...

Erməni yalanlarını ifşa edən azərbaycanlı kəşfiyyatçı anıldı (FOTO)

Gündəm Materials 2 Oktyabr 2018 13:42 (UTC +04:00)
Bu gün "ALYANS" Azərbaycan Xüsusi Xidmət Orqanlarının Veteranları İctimai Birliyi peşəkar və qəhrəman azərbaycanlı kəşfiyyatçı Məmmədhüseyn Əsədovun məzarını ziyarət ediblər.
Erməni yalanlarını ifşa edən azərbaycanlı kəşfiyyatçı anıldı (FOTO)

Bakı. Elçin Mehdiyev – Trend:

Bu gün "ALYANS" Azərbaycan Xüsusi Xidmət Orqanlarının Veteranları İctimai Birliyi peşəkar və qəhrəman azərbaycanlı kəşfiyyatçı Məmmədhüseyn Əsədovun məzarını ziyarət ediblər.

Trend-in məlumatına görə, ziyarətçilər mərhumun, həmçinin onun həyat yoldaşının məzarları üzərinə güllər qoyublar.

Trend İnformasiya Agentliyinin Baş direktorunun müavini Arzu Nağıyev bildirib ki, kəşfiyyatçı Məmmədhüseyn Əsədov barəsində məlumatlar indiyə qədər gizli saxlanılıb: “Biz bunu araşdırmışıq ki, M.Əsədovun SSRİ kəşfiyyat tarixində, 1943-cü ildə SSRİ, ABŞ və İngiltərə dövlət başçılarının Tehranda keçirilən konfransı zamanı sui-qəsd cəhdinin qarşısının alınmasında müstəsna xidmətləri olub. İndi çalışırıq ki, onun fəaliyyətinə qiymət verilsin, ictimaiyyət Azərbaycanın bu qəhrəman oğlu haqqında bilsin, onun haqqında kitab yazılsın”.

Daha sonra "ALYANS" Azərbaycan Xüsusi Xidmət Orqanlarının Veteranları İctimai Birliyinin sədr müavini Azər Qarayev M.Əsədovun həyatı və fəaliyyəti haqqında geniş məlumat verib.

O qeyd edib ki, indiyə qədər M.Əsədov haqqında heç bir məlumat olmayıb. A.Qarayev vurğulayıb ki, M.Əsədov 1900-cü ildə Həştərxanda anadan olub və 19 yaşında olarkən Qızıl Ordunun Xüsusi təyinatlı hərbi hissəsində qulluq etməyə başlayır:

“Böyük Vətən Müharibəsi başlayanda əməliyyat şəraitini yaxşı bildiyi, bir neçə dildə sərbəst danışdığı və geniş kəşfiyyat imkanlarına malik olduğuna görə, M.Əsədov Baş kəşfiyyat idarəsi tərəfindən İrana işləməyə göndərilir. Əsas iş istiqaməti isə ingilis və alman kəşfiyyatına qarşı əməliyyatların təşkilindən ibarət olub. 1943-cü ildə İran anti-Hitler koalisiyası rəhbərlərinin danışıqları üçün ən məqbul yer kimi seçilir. Bu, Stalinin təklifi idi. Konfransda dövlət xadimlərinin təhlükəsizliyinin təmin olunması həmin dövrdə SSRİ-nin Tehranda yerləşən rezidenturasına tapşırılır. Konfransa hazırlıq tam məxfi şəraitdə aparılırdı. Bu barədə xəbəri olanlardan biri də M.Əsədov idi. Müttəfiqlər hətta İran tərəfini təhlükəsizlik baxımından xəbərdar etmirdilər. Konfransın başlamasına 6 gün qalmış, yəni 22 noyabr 1943-cü ildə İran tərəfinə məlumat verildi”.

A.Qarayev vurğulayıb ki, noyabrın 28-də konfrans baş tutur: “Həmin vaxt Almaniya kəşfiyyatının dövlət başçılarına qarşı edəcəkləri sui-qəsd və terror aktı haqqında M.Əsədova məlumat verilir və o da öz növbəsində, təcili olaraq bu məlumatı rəhbərliyə məruzə edir. Vaxtında verilmiş məlumat nəticəsində planlaşdırılmış sui-qəsdin qarşısı çox peşəkarcasına alınır”.

A.Qarayev vurğulayıb ki, bu sui-qəsdin qarşısının alınmasında M.Əsədovun müstəsna rolu olub: “Yəni o görüşün təhlükəsizliyinin təmin olunması M.Əsədova həvalə olunub. Almanların kəşfiyyat orqanlarının dövlət başçılarına qaşı sui-qəsd törətmək üçün İrana diversant göndərməsi barədə ilk məlumatı məhz M.Əsədov alıb və rəhbərliyə məruzə edib. Onun fəaliyyəti nəticəsində bu sui-qəsdin qarşısı alınıb. Lakin o zaman SSRİ rezidenturasının rəhbərliyi erməni millətindən olan şəxs olduğu üçün bu əməliyyatı həmin şəxsin adına yazmağa çalışıblar. Biz SSRİ arxivlərini araşdırdıq, düzdür, həmin vaxt erməni millətindən olan şəxs rezidenturaya rəhbərlik edib, ancaq onun bu əməliyyatda heç bir rolu olmayıb, alman diversantlarının İranda tutulmasında şəxsən M.Əsədov iştirak edib. Sonradan həmin əməliyyatda iştirak edən əməliyyatçıların hamısına dövlət mükafatları təqdim olunub, lakin yeganə M.Əsədov olub ki, o, iki mükafatla - "Lenin" və "Qırmızı ulduz" ordenləri ilə təltif edilib”.

A.Qarayev vurğulayıb ki, Azərbaycanın qəhrəman oğlu haqqında toplanan fakt və sübutların işıq üzü görməsi, peşəkar kəşfiyyatçı haqqında məlumatlar toplusunun dərc olunması, yayımlanması ermənilərin tarixi saxtalaşdırmaq niyyətlərini faktiki olaraq faş etdi:

"Erməni tarixçiləri və onların havadarları hətta kəşfiyyat sahəsində tarixi saxtalaşdırsalar da, haqq, ədalət öz yerini tutdu".

Məqalədə:
Xəbər lenti

Xəbər lenti