Bakı. Trend:
ABŞ prezidenti Co Bayden qondarma “DNR” və “LNR”nin tanınması üçün Rusiyaya qarşı ilk sanksiyalar paketinin tətbiqi qərarını açıqlayıb.
Trend-in məlumatına görə, bu barədə ABŞ prezidenti çıxışı zamanı deyib.
Onun sözlərinə görə, bu sanksiyalar ABŞ-ın 2014-cü ildə tətbiq etdiyindən daha sərt olacaq:
"Mən (Rusiyanın fəaliyyətinə) cavab olaraq sanksiyalar tətbiq etməklə başlayacağam ki, bu, bizim və tərəfdaşlarımızın 2014-cü ildə atdığı addımlardan qat-qat əhəmiyyətli olacaq".
C.Bayden bildirib ki, xüsusilə, bloklaşdırıcı sanksiyalar (yəni SDN-Siyahısına daxil edilməsi) Rusiyanın "VEB" bankına təsir edəcək. O, həmçinin Rusiya müdafiə sənayesinin əsas bankı olan Promsvyazbank-ı da qeyd edib.
C.Bayden həmçinin söz verib ki, ABŞ fevralın 23-dən etibarən Rusiya elitasına və onların qohumlarına qarşı sanksiyalar tətbiq etməyə başlayacaq.
Sanksiyalar Rusiyanın xarici borc bazarlarına çıxışına da təsir edəcək.