Azərbaycan, Bakı, 18 noyabr /Trend, müxbir T.Hacıyev/
Bakı teleqülləsinnin ətrafındakı ərazidə partlamamış hərbi sursatların təmizlənməsi əməliyyatı yekunlaşmaq üzrədir. Bu barədə cümə axşamı Trend-ə Azərbaycan Ərazilərinin Minalardan Təmizlənməsi üzrə Milli Agentliyin (ANAMA) hadisə yerində çalışan əməliyyatçısı Pərviz Gidayev məlumat verib.
Onun sözlərinə görə, hazırda əraziyə təkrar baxış keçirilir. "Təmizləmə işləri müəyyən olunmuş standartlara uyğun həyata keçirilir. Sabah axşama qədər ərazidəki işlər yekunlaşacaq", - Gidayev əlavə edib.
ANAMA-dan cümə axşamı Trend-ə bildiriblər ki, təmizləmə işləri yekunlaşdıqdan sonra keyfiyyət yoxlanışı da aparılacaq və bu yoxlamanın nəticəsi olaraq əraziyə sertifikat veriləcək.
Noyabrın 10-da gecə Bakıda teleqüllənin yaxınlığında mindən çox partlamamış hərbi sursat aşkarlanıb. Həmin yerdə ANAMA və Fövqəladə Hallar Nazirliyinin əməkdaşları təmizləmə əməliyyatı aparıblar. ANAMA-nın məlumatına görə indiyə qədər ərazidən 2300 ədəd 125mm-lik zirehdələn tank mərmisi aşkar edilərək təhlükəsiz əraziyə aparılıb.
