...

Mübariz Əhmədoğlu: Ermənistan və həmsədrlər Dağlıq Qarabağ münaqişəsinin tənzimlənməməsi üzrə müttəfiqdirlər

Ermənistan-Azərbaycan münaqişəsi Materials 27 Fevral 2015 11:08 (UTC +04:00)
“Ermənistan rəhbərliyi itkin düşənlərin siyahısının hazırlanması üzrə Fransa prezidenti Fransua Ollandın təklifini rədd etdilər. Səbəb bəllidir. Ermənilər bu təklifin də reallaşmasında özlərinin ifşa olunacağını gördülər. Həmsədrlər təxminən bir il bundan əvvələdək məcburi köçkünlərin öz doğmalarının məzarlarını ziyarət etmək məsələsini gündəliyə gətirmişdilər”.
Mübariz Əhmədoğlu: Ermənistan və həmsədrlər Dağlıq Qarabağ münaqişəsinin tənzimlənməməsi üzrə müttəfiqdirlər

Azərbaycan, Bakı, 27 fevral /Trend, müxbir Elçin Mehdiyev/

"Ermənistan rəhbərliyi itkin düşənlərin siyahısının hazırlanması üzrə Fransa prezidenti Fransua Ollandın təklifini rədd etdi. Səbəb bəllidir. Ermənilər bu təklifin də reallaşmasında özlərinin ifşa olunacağını gördülər. Həmsədrlər təxminən bir il bundan əvvələdək məcburi köçkünlərin öz doğmalarının məzarlarını ziyarət etmək məsələsini gündəliyə gətirmişdilər". Bunu Trend-ə Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu deyib.

Politoloq qeyd edib ki, Ermənistan bu təklifə razılıq vermədi, çünki Dağlıq Qarabağ azərbaycanlılarının işğal olunmuş ərazilərdəki məzarları ziyarət etməsi bütün Dağlıq Qarabağın Azərbaycana məxsus olduğunu nümayiş etdirəcəkdir:

"Münaqişədən sonra doğulan gənc erməni nəsli ora gələn azərbaycanlılarla maraqlana bilər, valideynlərinə çətin suallar verə bilərdilər. Nəhayət ki, gənc ermənilər bu torpaqların əsil sahibləri haqqında həqiqəti bilərdilər.Məzarların azərbaycanlılar tərəfindən ziyarətinin regional və beynəlxalq mətbuatda işıqlandırılması ermənilər üçün ifşa edici olacaq idi. Ora gedən istənilən azərbaycanlı özünün bir neçə yüz illik nəsil şəcərəsini ortalığa qoya bilərdi. Amma R.Koçaryan, B.Saakyan, D.Babayan və sairlərin nəsil şəcərələri 200 ildən oyana keçmir. Dəqiq bəlli faktlardır ki, onları İran ərazisindən bu torpaqlara çar Rusiyası səfir A.Qriboyedovun təlimatı ilə yerləşdirib. İndi ermənilər özlərini bu torpaqların sahibi kimi təqdim edirlər. ATƏT MQ sədrlərinin fəaliyyəti də onlarda bu inamı daha da möhkəmləndirir".

M.Əhmədoğlu vurğulayıb ki, eləcə də həmsədrlərin fəaliyyətindən ermənilər işğalçılığı daha da möhkəmləndirmək mesajları alırlar: "Yenilənmiş Madrid Prinsipləri yayılan kimi həmsədrlər onun effektini azaltmağa başladılar. Çünki bu sənəd Dağlıq Qarabağ münaqişəsini həll etmək gücündədir. Yenilənmiş Madrid Prinsiplərinə görə Dağlıq Qarabağ münaqişəsinin həlli Dağlıq Qarabağ ətrafındakı rayonların dərhal, Dağlıq Qarabağın özünün isə bir neçə on ildən sonra Azərbaycana qaytarılmasını nəzərdə tutur. Təbii ki, Dağlıq Qarabağ erməniləri Azərbaycanın tərkibində təhlükəsiz şəraitdə yaşayıb inkişaf etmək hüququ əldə edirlər. Yenilənmiş Madrid Prinsipləri ermənilərin indiki uydurma maraqları ilə uyğun deyil. Ona görə Ermənistan və həmsədrlər ictimaiyyət qarşısında Yenilənmiş Madrid Prinsiplərini dəstəkləsələr də real fəaliyyətləri onu neytrallaşdırmağa yönəlmişdi. Həmsədrlərin məhz belə fəaliyyəti erməniləri tənzimləmədən tamam uzaqlaşdırıb. Ermənistan və həmsədrlər Dağlıq Qarabağ münaqişəsinin tənzimlənməməsi üzrə müttəfiqdirlər".

Politoloq əlavə edib ki, son 6 ay ərzində Ermənistan 3 həmsədr ölkə tərəfindən irəli sürülən təklifi rədd edib:

"Ötən ilin avqustunda Soçidə Rusiya prezidenti Vladimir Putin Dağlıq Qarabağ münaqişəsinin mənşəyini və tarixini nəzərə alaraq Dağlıq Qarabağ tənzimlənməsində Rusiyanın xüsusi statusa malik olmasını təklif etdi. Azərbaycan Prezidentı bu təklifi qəbul etdi. Çünki RF prezidentinin bu təklifi Dağlıq Qarabağ münaqişəsini tənzimləyə bilərdi. Ermənistan prezidenti S.Sərkisyan Soçidə Putinin bu təklifini rədd etdi. Çünki bu təklif Dağlıq Qarabağ münaqişəsini tənzimləyə bilərdi".

M.Əhmədoğlu əlavə edib ki, Fransa prezidenti F.Oland prezidentlərin görüşündə 3 təklif irəli sürdü: "Hərbi gərginliyi azaltmaq, Beynəlxalq Qırmızı Xaç Komitəsi ilə itkin düşənlərin siyahısını hazırlamaq və Böyük Sülh sazişinin hazırlanmasına başlamaq. F.Ollandın təklifləri Dağlıq Qarabağ münaqişəsinin tənzimlənməsinin bünövrəsini qoya bilərdi. Azərbaycanın münasibəti bu təkliflərə müsbət oldu. Ermənistan Parisdə prezidentlərin görüşündən dərhal sonra işğal altındakı ərazilərimizdə Dağlıq Qarabağ münaqişəsi başlanandan bəri ən böyük hərbi təlimini keçirdi. Böyük Sülh Müqaviləsinin hazırlanmasına başlamaq üçün iki şərt irəli sürdü. Ən nəhayət itkin düşənlərin siyahısının hazırlanmasına razılıq vermədi. Səbəb ermənilərin qırdığı azərbaycanlıların məzarlıqlarının aşkarlanıb ermənilərin üzünə şahid durmasıdır. DNT analizi həmin məzarlarda basdırılanların demək olar ki, hamısının azərbaycanlı olduğunu sübut edəcəkdi. Ona görə də Ermənistan Fransa prezidentinin təklifini rədd etdi".

Politoloq əlavə edib ki, ABŞ dövlət katibinin Avrasiya məsələləri üzrə müavini Viktoria Nuland regiona səfəri zamanı Bakıda və Yerevanda Azərbaycanlı girovların azadlığa buraxılmasını tələb etdi:

"Az sonra ABŞ dövlət departamentinin mətbuat xidmətinin rəhbəri C.Psaki bu bəyanatı yenidən təkrarladı. Ermənistan, o cümlədən Dağlıq Qarabağdakı separatçıların başında duranlar dərhal ABŞ-ın bu təklifini də rədd etdilər. Həmsədrlər fikirləşməlidirlər ki, 3 həmsədr ölkə rəhbərliyinin təklifini rədd etmək gücü Ermənistanda haradan peyda olub?! ATƏT MQ həmsədrlərinin indiki davranışına baxanda insan şəxsiyyətinin dramı ilə rastlaşırsan. Həmsədrlər daha bundan aşağı səviyyəli təklif verə bilməyəcəklər. Əslində, itkin düşənlərin siyahısının hazırlanması Dağlıq Qarabağ tənzimlənməsində elə də ciddi effekt yaratmayacaqdı. Amma həmsədrlər bunu hansısa praktiki addımın atıldığı kimi qələmə verə bilərdilər. Qudurtduqları Ermənistan rəhbərliyi həmsədrlərə bunu da çox gördü".

Politoloq qeyd edib ki, yenilənmiş Madrid Prinsipləri funksionaldır, imkanları genişdir: "Həmsədrlərə yardım edə bilər. Yenilənmiş Madrid Prinsiplərinin 5-ci maddəsi bütün məcburi köçkün və qaçqınların əvvəlki yaşayış yerinə qayıtması hüququnu aktuallaşdırır. Həmsədrlər Yenilənmiş Madrid Prinsiplərinin 5-ci maddəsinə uyğun olaraq Azərbaycanı tərk etmiş ermənilərin Azərbaycana, Ermənistandan qovulmuş azərbaycanlıların isə Ermənistana qayıtması məsələsi ilə məşğul ola bilərlər. Bu artıq Dağlıq Qarabağ tənzimlənməsinə yeni yanaşma ortalığa qoya bilər".

Məqalədə:
Xəbər lenti

Xəbər lenti