Azərbaycan, Bakı / Trend , müxbir İ.Əlizadə /Azərbaycanın "Mədəniyyət haqqında" Qanunu ciddi şəkildə dəyişdiriləcək. Bu barədə çərşənbə axşamı Parlamentin mədəniyyət məsələləri daimi komissiyasının sədri, millət vəkili Nizami Cəfərov məlumat verib.
"Mədəniyyət Nazirliyində belə hesab edirdilər ki, "Mədəniyyət haqqında" yeni Qanun layihəsi hazırlanıb qəbul olunmalıdır. Lakin hesab edirəm ki, "Mədəniyyət haqqında" qanuNu dəyişməklə də istədiyimizə nail ola bilərik. Bundan başqa, bu Qanun olduğuna görə, onu tez-tez yenisi ilə əvəz etmək olmaz", -deyə komissiya sədri bildirib.
"Mədəniyyət haqqında" Qanun 1997-ci ildə qəbul olunub.
Cəfərov bildirib ki, qanun qəbul olunduqdan sonra Azərbaycanda və dünyada böyük dəyişikliklər baş verib. Ona görə də "Mədəniyyət haqqında" Qanun müasir dövrün tələblərinə cavab vermir, mədəniyyət sahəsinə aid olan bir sıra proseslər Qanunun təsirindən kənarda qalır.
Komissiya sədri Qanunda hansı dəyişikliklərin ediləcəyini açıqlamasa da, dəyişikliklərin 40-50 faiz olacağını bildirib.
Onun sözlərinə görə, prezident İlham Əliyevin tapşırığına uyğun olaraq Mədəniyyət və Turizm Nazirliyində Azərbaycan mədəniyyətinin 10 illik İnkişaf Proqramının müzakirəsi başa çatıb: "Proqramın hazırlanması tam başa çatdıqdan sonra "Mədəniyyət haqqında" Qanunun dəyişdirilməsi üçün müzakirələrə başlayacağıq".