Azərbaycan, Bakı, 01 fevral / Trend , müxbir D.Xatınoğlu/ Parlament seçkilərində namizəd kimi iştirak etmək istəyən şəxslərə lazımi şərait yaradılmamasına, ölkədə azad və demokratik seçki şəraəti olmamasına baxmayaraq, islahatlara meylli fəallar əhalini öz huquqlarını fəal tələb etməyə çagırırlar. "İran xalqı, ölkədə demokratiyanın bərpası üçün passiv mövqe tutmamalıdır"-deyə, Etimad-Milli partiyasının fəalı Ayətulla Əbülfəzl Şükuri "Trendə" bildirib.
Yanvarın 31-də İranın 350 nəfər siyasi fəalı açıq məktubla ölkə içtimaiyyətinə müraciət edərək, xalqı martda keçiriləcək parlament seçkilərində yaxından iştirak etməyə və yeni "milli və güclü" bir hakimiyyətin qurulmasına fəal şəkildə dəstək verməyə çagırıblar. BBC-nin fevralın 1-də yaydığı məlumata əsasən, məruzədə qeyd olunub ki, xalqın dəstəyini qazana bilməyən hakimiyyət, öz iqtidarını qorumaq məqsədilə, biganə ölkələrə imtiyaz verməyə məcbur olur. Siyasi fəallar növbəti Parlament seçkilərində müxtəlif partiyalara bərabər şərait yaradılmasını və seçkilərin ədalətli keçirilməsini hakimiyyətdən tələb ediblər.
İRNA-nın yanvarda verdiyi məlumata əsasən, deputatlıga iddialı olanların yalnız 6 9 faizinin namizədliyi təsdiq olunub.
"Deputatlıga iddialıların çox hissəsinin namizədliyinin qeydə alınmasa da, qeyri - bərabər şərait hökm sürsə də, növbəti Parlament seçkilərini boykot etməyəcəyik" - deyə, cümə günü Tehrandan müraciətə qoşulan Etimad-Milli idarə heyətinin üzvü Şükuri telefonla bildirb.
Şükurinin fikrincə, partiya nümayəndələrini qeydə almasalar da, hətta bir namizəd də olsa, Parlament seçkilərində iştirak edib, boykota yol verilməyəcək. "Bizim bəzi numəyəndələrimizin namizədliyi qeydə alınmayıb. Bununla bağlı etiraz etmişik və ümid edirik ki, şikayətmizə baxılacaq. Hələ ümidimizi itirməmişik, hətta qeyri-bərabər və qeyri-demokratik şərait davam etsə də, seçkiləri boykot etməyəcəyik"-deyə, Şükuri qeyd edib.
Xalqa müraciəti imzalayan digər politoloq İsa Səhərxiz isə, bu gün Tehrandan telefonla Trend ə bildirib ki, namizədlərin səlahiyyətlərinin geniş şəkildə rədd olunması xalqda növbəti Parlament seçkilərinə bir növ etinasızlıq yaradıb."Seçkilər bu şəraitdə keçirilsə, xalqın və partiyaların əksəriyyətinin seçkilərə qatılmamasını istisna etmirəm"- deyə, Səhərxiz əlavə edib ki, xalq, birinci növbədə, bu diktatura fəzasını aradan qaldırmalıdır və öz namizədlərini Parlamentə göndərməlidir.
Həmin müraciətin bir hissəsində, xalqın hakimiyyətə arxa durmadığı və dəstək vermədiyi qeyd olunub.Müraciət "hazırda dövlətin xarici siyasəti millətin haqqını pozur"-cümləsi ilə başlayır. Siyasi fəallar bildiriblər ki, rəsmi Tehran daxildə xalqın dəstəyini qazana bilmədiyi üçün, öz hakimiyyətini davam etdirməyə biganə dövlətlərə imtiyaz vermək məcburiyyətində qalıb.
İran Tədqiqatçılar Assosiasiyasının sədri Hüseyn Lacəvərdi bu gün telefonla Parisdən Trend ə bildirib ki, İran hakimiyyəti ABŞ-ın təzyiqləri və özünün uğursuz siyasətləri nəticəsində zəifləyib və qonşu ölkələr bu şəraitdən süi-istifadə edərək, İrandan imtiyaz alırlar.
İranın XİN rəhbəri Mənuçehr Müttəki 2007-ci ilin dekabrında mətbuata açıqlamasında bildirmişdi ki, İranın tarixən Xəzər dənizindən istifadəsi 11.3%-dən artıq olmayıb. Bu bəyanat İranda böyük rezonansa səbəb oldu.
Lacəvərdinin fikrincə, İranın, Xəzər dənizinin hüquqi statusunun müəyyənləşdirilməsindən əlavə, Bəhreynlə üç ada üzərində mübahisəsi, İraq-İran arasında sərhədlərin müəyyənləşdirilməsi və digər müzakirələrdə də güzəştə getməsi istisna olunmur və bu, xalqın maraqlarına ziddir.
