Azərbaycan, Bakı, 13 fevral / Trend , müxbir K.Zərbalıyeva/ Azərbaycanda hakimlərin mühafizəsi gücləndirilməlidir. Bu qənaətdə olan Ali Məhkəmənin hakimi Oqtay Maqsudov Trend ə bildirib ki, digər xarici ölkələrdə hakimlərin, ailələrinin və əmlaklarının xüsusi qaydada mühafizəsi təmin olunub.
Ali Məhkəmənin hakimi hesab edir ki, qanunda hakimlərin, ailələrinin və əmlaklarının təhlükəsizliyinin təmin olunması ilə bağlı müddəalar olsa da, onların mühafizəsinin təşkili lazımi səviyyədə deyil. "İranda hakimlər həm işdə olduqları müddətdə, həm də işdən sonra xüsusi mühafizəçilər tərəfindən qorunur" - deyə hakim vurğulayıb.
"Məhkəmələr və Hakimlər haqqında" qanunun tələblərinə görə, hakimlərin təhlükəsizliyini təmin etmək məqsədi ilə onlara qanunvericilik ilə müəyyən edilmiş qaydada xidməti silah verilə bilər. Hakimlərin öz səlahiyyətlərini icra etdikləri bütün müddət ərzində qanunvericiliklə nəzərdə tutulmuş qaydada və hallarda xidməti silahı saxlamaq, gəzdirmək və təyinatı üzrə istifadə etmək hüququ vardır, zəruri hallarda onların təhlükəsizliyi təmin edilir.
Bakı Apellyasiya Məhkəməsinin hakimi İlham Əsədov bildirib ki, Azərbaycanda hakimlərin və ailələrinin həyatına, əmlaklarına təhlükə olmadığından onların xüsusi mühafizəsinə də ehtiyac yoxdur. Əsədov qeyd edib ki, hakimlər müraciət etdikləri təqdirdə, onların və ailələrinin müahfizəsi təmin olunur.
Əsədov bildirib ki, hakim özünün və ailəsinin həyatına hər hansı təhlükə hiss edərsə silahla təmin olunması, mühafizəsinin təşkili üçün hüquq-mühafizə orqanlarına müraciət edə bilər.
Əsədov hesab edir ki, Ermənistanla sərhəddə yerləşən rayonların məhkəmə hakimlərinin həyatı üçün təhlükə olduğundan onların mühafizəsinin təşkilinə ehtiyac var.
O, cinayət işlərinə baxan hakimlərin peşə fəaliyyəti ilə bağlı hədə-qorxu, təzyiq və təhdidlərə məruz qalma ehtimalını istisna etmir. "Bu halda hakim təhlükəsizliyini təmin etmək üçün hüquq-mühafizə orqanına müraciət edə bilər. Hələlik praktikada belə bir hal olmayıb" - deyə Əsədov qeyd edib.
Bakı Apellyasiya Məhkəməsinin hakimi Rəsul Səfərov bildirib ki, hakimlərin silahla təmin olunması, onların mühafizəsinin gücləndirilməsi üçün əsas olmalıdır. "Belə bir əsas olarsa, hüquq-mühafizə orqanları həmin hakimin təhlükəsizliyinin təmin olunması üçün zəruri tədbirləri həyata keçirir".
Ekspert Rəşid Hacılı hesab edir ki, hakimlərin təhlükəsizliyinin təmin olunması, onlara silah verilməsi üçün real təhlükənin olması vacib deyil.
"Hakim əmin olmalıdır ki, onun, ailəsinin, əmlakının təhlükəsizliyi qorunur. Ona təzyiq, təhdid yoxdu. Vacib deyil ki, reallıqda belə bir təhlükə var, ya yoxdu" - deyə ekspert vurğulayıb.
Ekspertin fikrincə, Azərbaycanda hakimlərin təhlükəsizliyi üçün real təhlükə yoxdur.
Hacılı qeyd edib ki, hakimə silah verilməsi onun təhlükəsizliyinin təmin olunması üçün yetərli deyil. "Elə hakimlər var ki, onlar silah gəzdirmək istəmir. Məsələn, qadın hakimlər silah gəzdirməyə meylli deyillər" - ekspert bildirib.
Hacılı deyib ki, hakimlərin müstəqilliyinin qorunması üçün təhlükəsizliklərinin təmin olunması vacibdir. "Silah hakimi nə rüşvətdən, nə də məmur tapşırığından qorumayacaq. Hakim daha müstəqil, ədalətli olarsa, onun təhlükəsizliyinə daha real təhlükə var. Hakimin qərarından narazı qalan şəxs problemini rüşvətlə həll edə bilirsə, onda hakimə qarşı hansısa cinayəti törətməyə ehtiyac görmür" - deyə Hacılı vurğulayıb.
Məhkəmə-Hüquq Şurası Aparatının rəhbəri Cavid Hüseynov Trend ə bildirib ki, hakimlərin mühafizəsinin gücləndirilməsi ilə bağlı hüquq-mühafizə orqanlarına müraciət etmələrinə dair Şuraya məlumat daxil olmayıb.
Hüseynov da Azərbaycanda hakimlərin həyatına peşə fəaliyyəti ilə bağlı təhlükə olmadığını deyib.
Daxili İşlər Nazirliyi neçə hakimin silahla təmin olunmaq, mühafizəsinin gücləndirilməsi üçün müraciət etdiyi barədə sorğuya cavab verməyib.
Mətbuat xidmətinin rəhbəri Sadiq Gözəlov Trend ə bildirib ki, bütün Azərbaycan vətəndaşlarının təhlükəsizliyi daxili işlər orqanları tərəfindən yüksək səviyyədə qorunur. "Təhlükəsizliyin təmin olunması ilk növbədə sabitliyin olmasından asılıdır. Bunu Azərbaycanda yaşayan əcnəbilər, ölkəmizdə səfərdə olan beynəlxalq təşkilatların nümayəndələri də bəyan edir" - deyə nazirlik rəsmisi bildirib.
Gözəlov silahla, əməliyyat-axtarış tədbirləri ilə bağlı məlumatların mətbuat üçün qapalı olduğunu əsas gətirərək, bu barədə məlumatları açıqlamayıb.
Son bir neçə ildə Azərbaycanda hakimlərin həyatına qəsdlə bağlı iki fakt qeydə alınıb.
Apellyasiya Məhkəməsinin hakimi Bəhram Şükürovun həyatına sui-qəsd edilib.
İqtisad Məhkəməsinin hakimi Solmaz Əsgərova isə keçmiş həyat yoldaşı tərəfindən məhkəmənin binası qarşısında soyuq silahla qətlə yetirilib.
Beynəlxalq təşkilatların hesabatlarında Azərbaycan məhkəmələrinin və hakimlərinin fəaliyyəti tənqid olunur. Eləcə də, ölkə vətəndaşlarının dövlət orqanlarına müraciətlərinin böyük bir qismi də məhkəmələrin fəaliyyəti ilə bağlıdır.
Azərbaycan Respublikası Konstitusiyasının 127-ci maddəsinin birinci hissəsinə uyğun olaraq, hakimlər müstəqildirlər və yalnız Azərbaycan Respublikasının Konstitusiyasına və qanunlarına tabedirlər.
Hakimlərin müstəqilliyi onların səlahiyyətli dövründə siyasətsizləşdirilməsi, dəyişilməzliyi və toxunulmazlığı ilə, vəzifəyə təyin olunmasının, məsuliyyətə cəlb edilməsinin, vəzifədən kənarlaşdırılmasının və səlahiyyətlərinə xitam verilməsinin məhdudlaşdırılması ilə, məhkəmə hakimiyyətinin müstəqil fəaliyyət göstərməsi və ədalət mühakiməsinin qanunda nəzərdə tutulmuş qaydada həyata keçirilməsi ilə, məhkəmə icraatına hər hansı şəxs tərəfindən məhdudiyyət qoyulmasının və müdaxilə edilməsinin yolverilməzliyi ilə, hakimlərin şəxsi təhlükəsizliyinin təmin edilməsi yolu ilə həyata keçirilir və onlara vəzifələrinə uyğun maddi və sosial təminatlar verilir.
Müəlliflə əlaqə saxlamaq üçün elektron ünvan - [email protected]
