Azərbaycan, Bakı, 14 fevral / Trend , müxbir S.İlhamqızı/ "Bakı xəbər" qəzetinin baş redaktoru Aydın Quliyev yaxın zamanda yeni siyasi təşkilat yaradacaq.
"Bu ya siyasi partiya, ya da siyasi yönümlü qeyri-hökumət təşkilatı olacaq" - deyə Quliyev Trend ə açıqlamasında bildirib.
Onun sözlərinə görə, yaradacağı siyasi təşkilat müstəqil olacaq və heç bir siyasi liderə dəstək verməyəcək. Quliyev keçmiş lideri Rəsul Quliyevə də heç bir dəstək göstərməyəcəyini və təşkilatının ona bağlı olmayacağını deyib.
Quliyevin sözlərinə görə, yeni təşkilatın yaradılması işində tək deyil və ətrafında həmfikirləri də var: "Bu insanlar həm cəmiyyətdə tanınan, vaxtilə mənimlə bir partiyada təmsil olunan şəxslər, həm də cəmiyyət üçün yeni simalardır. Bu həmfikirlərim son 10 ildə mənim əməkdaşlıq etdiyim, yaxından tanıdığım insanlardır" - deyə Quliyev bildirib.
Onun sözlərinə görə, təşkilatını bu ilin oktyabrında keçiriləcək prezident seçkisindən əvvəl yaradacaq: "Yaxın aylarda ya partiya, ya başqa formada siyasi təşkilatımızı cəmiyyətə təqdim edəcəyik" - deyə Quliyev bildirib.
Quliyev Azərbaycanın eks-spikeri Rəsul Quliyevin rəhbərlik etdiyi müxalifətçi Azərbaycan Demokrat Partiyasında təmsil olunub, katib, Ali Məclis üzvü olub. Ötən ilin əvvəlində Quliyev və tərəfdarları ADP-dən ayrılaraq Açıq Cəmiyyət Partiyasını yaradıblar. Quliyev ACP-nin lideri Quliyevin müşaviri olub, ötən ilin sentyabrında bu vəzifəsindən və partiyadan istefa verib.
Müəlliflə əlaqə saxlamaq üçün elektron ünvan - [email protected]