Azərbaycan, Bakı, 20 fevral / Trend İ.Əlizadə/ Türkdilli ölkələrin Parlament Assambleyasının yaradılması istiqamətində işlər başlayıb. "Türkdilli dövlətlərin Parlamentlərarası Şurasının Türkiyədə keçiriləcək ilk toplantısı Assambleyanın yaradılması işinin başlanğıcı və bununla bağlı atılan ilk addımdır" - deyə çərşənbə günü Trend ə açıqlamasında Azərbaycan Parlamentinin Türkiyə ilə əlaqələr üzrə İşçi qrupunun sədri, deputat Nizami Cəfərov bildirib.
Türkdilli dövlətlərin Parlamentlərarası Şurasının ilk toplantısı fevralın 21-22-də Türkiyənin Antalya şəhərində keçiriləcək.
Toplantıda Şuranın Rəyasət Heyəti, tərkibi, üzvlük şərtləri, işçi dilləri və digər təşkilati məsələlər müzakirə olunacaq. Bir sıra türkdilli ölkələrin parlamentlərinin üzv olacağı bu Şuranın yaradılmasında məqsəd türkdilli ölkələr arasında parlamentlər birliyi şəklində ortaq bir mexanizmin qurulmasına və qarşılıqlı münasibətləri gücləndirərək siyasi baxışların uyğunlaşdırılmasına, təcrübə mübadiləsinə, birgə layihələrin həyata keçirilməsinə nail olmaqdan ibarətdir.
Toplantıda birinci vitse-spiker Ziyafət Əsgərovun başçılıq etdiyi Azərbaycan nümayəndə heyəti də iştirak edəcək. Nümayəndə heyətinə deputatlardan Rafael Cəbrayılov, Əhməd Vəliyev və Milli Məclis rəhbərliyi katibliyinin rəisi Səyyad Ələsgərov daxildir. Cəfərov hesab edir ki, bir neçə ildir ki, davam edən gərgin müzakirələrdən sonra türkdilli ölkələrin Parlament Assambleyasının yaradılması işinin başlaması müsbət haldır.
"Türkdilli ölkələrin Parlament Assambleyasının yaradılması tarixi zərurətdir və buna böyük ehtiyac var. Ona görə də Assambleya mütləq yaradılmalıdır" - deyə İşçi qrupun rəhbəri əlavə edib.
Dünyada altı müstəqil və 20-dən artıq türkdilli muxtar respublika var. Müstəqil ölkələr Azərbaycan, Türkiyə, Qırğızıstan, Qazaxıstan, Türkmənistan və Özbəkistandır.