Azərbaycan, Bakı, 04 mart / Trend , müxbir S.İlhamqızı/ Müxalifətçi Açıq Cəmiyyət Partiyası və Müsavat Partiyası qarşıdan gələn prezident seçkisində hərə öz namizədilə iştirak etmək və bir-birinin əleyhinə təbliğat aparmamaq barədə razılığa gəliblər. Bu barədə Trend a ACP-nin lideri Rəsul Quliyevin müşaviri Zəminə Dünyamalıyeva açıqlama verib.
Dünyamalıyeva bu gün Müsavat başqanı İsa Qəmbərlə görüş keçirib, bu ilin oktyabrında Azərbaycanda keçiriləcək prezident seçkisi barədə müzakirələr aparıb.
Hər iki tərəf prezident seçkisində müxalifətin vahid namizədinin olmaması, blokların yaradılmamasının tərəfdarı kimi çıxış edhib: "Rəsul Quliyev də, İsa Qəmbər də hesab edirlər ki, hər bir müxalifət partiyası seçkidə öz bazası ilə iştirak etməlidir. İsa Qəmbərlə görüşdə də razılaşdırdıq ki, hər iki partiya öz namizədi ilə iştirak edir, eləcə də bir-birinin əleyhinə təbliğat aparmır, biri digərinin kampaniyasmına mane olmur"-deyə Dünyamalıyeva bildirib.
O deyib ki, tərəflər prezident seçkisinin həlledici mərhələsində birinin digərini dəstəkləməsini də istisna etməyiblər. Razılaşdırıblar ki, seçki prosesində kimin daha güclü, bazasının daha geniş olduğu ortaya çıxarsa, ən şanslı namizədə dəstək verilə bilər.
2003-cü ildə keçirilmiş prezident seçkisində Rəsul Quliyevin də namizədliyi qeydə alınmış, lakin seçkiyə az qalmış o, İsa Qəmbərin namizədliyini dəstəkləmişdi.
Dünyamalıyeva hesab edir ki, Quliyev bu dəfə heç bir namizədi dəstəkləməyəcək və özü seçkidə iştirak etməkdə israrlı olacaq.
Müsavat başqanı mövzu ilə bağlı şərh verməkdən imtina edib.
Azərbaycanın eks-spikeri (1995-96-ci illər) Rəsul Quliyev 1996-cı ildən ABŞ-da mühacirətdədir.
Eks - spiker (1992-93-cü illər) İsa Qəmbər 2003-cü ilin prezident seçkisində 8 nəfər namizəd arasında ikinci olub.
