Azərbaycan, Bakı, 18 mart / Trend , müxbir E.Hüseynov / Strasburqda martın 19-da ilk dəfə olaraq Avropa Şurası (AŞ) ilə GUAM (Gürcüstan, Ukrayna, Azərbaycan və Moldova) arasında məsləhətləşmələr keçiriləcək. Bu barədə çərşənbə axşamı Trend a Azərbaycanın Avropa Şurasındakı nümayəndəsi, səfir Arif Məmmədov bildirib.
"Bu, belə səviyyədə ilk məsləhətləşmələr olacaq və mənə elə gəlir ki, onlar uğurlu alınacaq" - deyə Azərbaycanın AŞ yanında daimi nümayəndliynin rəhbəri Məmmədov bildirib.
GUAM formatı 1997-ci ildə Strasburqda Avropa İttifaqı dövlət başçılarının sammiti zamanı postsovet dövlətləri tərəfindən yaradılıb. 1999-cu ildə bu formata Özbəkistan daxil olsa da, dörd ildən sonra onu tərk edib. 2006-cı ildə Kiyevdə ilk sammit zamanı GUAM-ın beynəlxalq təşkilat və "Demokratiya və iqtisadi inkişaf uğrunda təşkilat - GUAM" kimi elan olunması haqda qərar qəbul olunub.
Strasburqdakı məsləhətləşmələr AŞ Nazirlər Komitəsinin xarici əlaqələr Qrupu ilə GUAM ölkələri arasında keçiriləcək. Bu məqsədlə GUAM-ın baş katibi Valeri Çeçelaşvili və təşkilata üzv ölkələrin nümayəndələri Strasburqa gələcəklər. GUAM-a sədrlik edən ölkə kimi Azərbaycan missiyasına XİN-in Xarici siyasətin planlaşdırılması və strateji analitik araşdırmalar idarəsinin rəisi Tofiq Musayev rəhbərlik edəcək.
Səfir bildirib ki, bütövlükdə AŞ ilə GUAM arasında üç-dörd tədbirin keçirilməsi planlaşdırılır və hazırkı məsləhətləşmələr onlardan birincisi olacaq. "AŞ-da GUAM-a dəstək artır, xüsusilə də Şərqi Avropa ölkələri - Polşa, Rumıniya və Baltik ölkələri arasında. Onlar GUAM-ın AŞ ilə əməkdaşlığına böyük diqqət ayırır və bu məsələyə kifayət qədər dəstək göstərirlər" - deyə Məmmədov bildirib.
AŞ ilə məsləhətləşmələr GUAM-ın digər bir təşkilatla qarşılıqlı münasibətlərini yüksək səviyyədə müzakirə etdiyi ilk hadisədir.
