Azərbaycan, Bakı, 18 mart/ Trend , müxbir İ.Əlizadə/Azərbaycan müxalifətini təmsil edən Xalq Cəbhəsi Partiyasının (AXCP) qurultayı bu ilin iyun-iyul aylarında keçiriləcək. "Partiya qurultaya hazırlıq işlərini ötən il başa çıtdırıb. Lakin bir sıra problemlər olduğu üçün qurultayı keçirə bilmədik. AXCP Ali Məclisinin son iclasında qəbul olunan qərara əsasən qurultay iyun-iyul aylarında keçiriləcək" - deyə çərşənbə axşamı Trend ə açıqlamasında AXCP sədrinin müavini Həsən Kərimov məlumat verib.
Kərimov qeyd edib ki, qurultayda AXCP sədri Əli Kərimlinin, Ali Məclis sədrinin və Mərkəzi Nəzarət-Təftiş Komissiyasının ötən qurultaydan keçən dövrlə bağlı hesabatları dinləniləcək, təşkilati məsələlər müzakirə olunacaq, Ali Məclisin yeni tərkibi təsdiqlənəcək, partiyanın yeni sədri seçiləcək.
"Qurultayda qarşıdan gələn prezident seçkiləri ilə bağlı müzakirələr aparılacaq. Əgər AXCP prezident seçkisində iştirak etmək qərarına gəlsə, namizədimizi müəyyənləşdirəcəyik" - deyə sədr müavini əlavə edib.
Qurultayın harada keçiriləcəyi dəqiqləşdirilməyib. AXCP rəhbərliyi tədbiri dövlətin balansında olan mədəniyyət saraylarının birində keçirməyi planlaşdırır.
Müxalifəti təmsil edən AXCP hazırda "Azadlıq" siyasi blokunun üzvü və həmtəsisçisidir. Partiyanın qurucusu və 2000-ci ilə qədər sədri Azərbaycanın eks-prezidenti mərhum Əbülfəz Elçibəy olub. 2000-ci ildən indiyədək AXCP-yə keçmiş dövlət katibi, sabiq deputat Əli Kərimli sədrlik edir.