Azərbaycan, Bakı, 30 mart / Trend , müxbir C. Babayeva/Yaradılmasının məqsədi mayın 21-də keçiriləcək parlament seçkilərində iştirak etmək olan Gürcüstan azərbaycanlılarının ilk siyasi partiyası bu günədək dövlət qeydiyyatına alınmır. Bu da partiya üzvlərinin seçkidə iştirakını məhdudlaşdırır.
Bazar günü "Gürcüstan naminə" partiyasının sədri, Gürcüstan prezidentliyinə keçmiş namizəd Fazil Əliyevin Trend -a bildirdiyinə görə, Ədliyyə Nazirliyinə onlardan sonra müraciət etmiş bütün siyasi partiyalar dövlət qeydiyyatından keçib.
"Partiya sənədlərində bütün texniki səhvlərin bir neçə dəfə düzəldilməsinə baxmayaraq, Ədliyyə Nazirliyi partiyanı qeydiyyata almaqdan imtina edir. Partiya, həmçinin, təkrar təsis qurultayı da keçirib", deyə Əliyev bildirib.
"Gürcüstan naminə" partiyasının təsis qurultayı fevralın 3-də Tbilisidə keçirilib. Fevralın 4 - də partiyanın sənədləri Gürcüstanın Ədliyyə Nazirliyinə təqdim olunub. Gürcüstan qanunvericiliyinə əsasən, partiyanın qeydiyyat məsələsinə bir ay ərzində baxılır.
Əliyevin namizədliyi Gürcüstan Azərbaycanlılarının Milli Assambleyası və Gürcüstan Azərbacyanlılarının Beynəlxalq Şurası tərəfindən irəli sürülüb. Dekabrda Fazil Əliyev prezident seçkilərində iştirakdan imtina edib. O, qərarını "Gürcüstan dövlət strukturlarının təzyiqi ilə" izah edib. Nəticədə, Əliyev yeni konstruktiv müxalifət partiyasının yaradıldığını bəyan edib.
Əliyev partiyanın qeydiyyatının gecikməsi səbəbini partiya sədrinin azərbaycanlı olması ilə bağlı olduğunu istisna etməyib.
Gürcüstan MSK tərəfindən parlament seçkilərində iştirak edəcək siyasi təşkilatların ərizələrinin qəbulu martın 26-da başa çatıb. Dövlət qeydityyatına alınmadığına görə, "Gürcüstan naminə" partiyası seçkilərdə müstəqil olaraq iştirak edə bilməyəcək və digər siyasi partiya və ya seçki bloklarının namizədləri siyahısında öz namizədlərini irəli sürəcək.
Proporsional partiya siyahısı üzrə Gürcüstan parlamentinin deputatı olmaq üçün siyasi təşkilat beş faizlik həddi keçməlidir. Gürcüstan parlamentinə ümumilikdə 150 deputat seçiləcək. Onlardan 75-i partiya siyahısı üzrə qanunverici orqana keçəcək.
"Partiya dövlət qeydiyyatından keçmədiyi halda məhkəmə və beynəlxalq təşkilatlara müraciət etmək və etiraz aksiyaları keçirməyi planlaşdırır", deyə Əliyev bildirib.