Azərbaycan, Bakı, 16 aprel / Trend , müxbir S.İlhamqızı/ Azərbaycan Sosial Demokrat Partiyasının (ASDP) prezident seçkisində öz namizədi ilə iştirak etməsi üçün maliyyə vəsaiti yoxdur.
"Prezident seçkisi çox geniş bir kampaniyadır, bizim isə maliyyə imkanlarımız məhduddur"-deyə ASDP-nin həmsədri Araz Əlizadə çərşənbə günü Trend a açıqlamasında bildirib.
Əlizadənin sözlərinə görə, partiya üzvləri ASDP-nin lideri Ayaz Mütəllibovun prezidentliyə namizəd olmasını istəyirlər və bu təkliflərini Mütəllibova bildiriblər.
"Lakin Ayaz Mütəllibov hesab edir ki, Azərbaycana qayıda bilməyəcəyi təqdirdə seçkidə iştirak etməsinin mənası yoxdur. O, seçkidə namizədliyini irəli sürüb-sürməmək barədə qərarını may ayında verəcək"-deyə Əlizadə bildirib.
Əlizadə özünün isə namizəd olmasının gözlənilmədiyini deyib: "Mənim səhhətim prezident seçkisində iştiraka imkan vermir, seçki dövründə bütün bölgələri gəzmək, əhali ilə görüşlər keçirmək lazımdır. Həm də uğurlu seçki kampaniyası qurmaq üçün partiyamızın maddi imkanı yoxdur"-deyə Əlizadə bildirib.
O, hesab edir ki, əgər ASDP-nin prezidentliyə namizədi Mütəllibov olarsa, özü ilə müqayisədə onun seçki kampaniyasına çox vəsait tələb olunmayacaq, çünki ölkədə hamı Mütəllibovu tanıyır.
Əlizadə bildirib ki, ASDP-nin Mərkəzi Komitəsi prezidentliyə kimin namizədliyini irəli sürsə, həmin şəxs də ASDP-nin seçkidə namizədi olacaq.
Seçki üzrə ekspertlər bildirirlər ki, builki prezident seçkisində bir namizədin iştirakı, normal kampaniya qurması üçün azı 500 min manat sərf olunmalıdır.
ASDP sol təmayüllü müxalifət partiyasıdır. Partiyanın həmsədri Əlizadə, digər həmsədri isə Azərbaycanın eks-prezidenti, hazırda mühacirətdə yaşayan Mütəllibovdur.
1991-ci ildə Azərbaycan müstəqilliyini elan etdikdən sonra Mütəllibov ilk prezident seçilib. 1992-ci ildə Xalq Cəbhəsi Hərəkatının hakimiyyətə gəlişindən sonra ölkəni tərk edib, o vaxtdan indiyədək Rusiyada mühacirətdə yaşayır. Eks-prezident Azərbaycan Baş Prokurorluğunun ittihamı əsasında beynəlxalq axtarışa verilib. Mütəllibov dövlət çevirilişinə cəhd, qanunsuz silahlı dəstələrin yaradılması, zorla hakimiyyəti ələ almaq və digər ağır cinayətlər törətməkdə günahkar bilinir. Özü və partiyası isə bu ittihamları qondarma hesab edir.
Müəlliflə əlaqə saxlamaq üçün elektron ünvan - [email protected]