Azərbaycan, Bakı, 22 aprel / Trend , müxbir K.Ramazanova/ Bakıda Xəzər dənizi üzrə yeni çağırış və təhlükələrlə mübarizə, təhlükəsizlik məsələləri üzrə Xəzəryanı dövlətlərin ekspertlərinin görüşü gözlənilir. Bu barədə razılaşma dünən Azərbaycan və Rusiyanın XİN başçılarının telefon danışığı zamanı əldə olunub. Bu barədə Trend a çərşənbə axşamı Azərbaycan XİN-in mətbuat katibi Xəzər İbrahim məlumat verib.
İbrahim nazirlərin Azərbaycan-Rusiya münasibətlərinin aktual məsələlərini, həmçinin Xəzər regionunda vəziyyəti müzakirə etdiklərini bildirib.
Xəzərin hüquqi statusunun müəyyən edilməsinə dair məsələ SSRİ-nin dağılmasından sonra ortaya çıxıb. 1991-ci ilədək o, sahilyanı dövlətlər - İran və Sovet İttifaqı arasında razılaşma əsasında müəyyən olunub. 1998-ci ilin iyulunda Qazaxıstan və Rusiya sualtı sərvətlərin istifadəsi üzrə suveren hüquqların həyata keçirilməsi üçün Xəzər dənizinin şimal hissəsinin dibinin bölünməsinə dair müqavilə bağlayıb, 2002-ci il may ayında isə bu müqavilə üzrə protokol imzalanıb. Analoji sənədləri 2001-ci ilin noyabr və 2003-cü ilin fevral aylarında Qazaxıstan və Azərbaycan da imzalayıb.
Xəzəryanı dövlətlər 2003-cü ilin noyabr ayında Xəzərin dəniz mühitinin qorunmasına dair Çərçivə konvensiyası imzalayıb.
2003-cü ilin may ayında Qazaxıstan, Azərbaycan və Rusiya arasında Xəzər dənizinin dibinin sərhəd hissələrinin ayrılmasına dair müqavilə bağlanıb.
Müəlliflə əlaqə saxlamaq üçün elektron ünvan : trend
