Azərbaycan, Bakı, 12 may / Trend , müxbir E.Babayev/ Seçki Məcəlləsinə əlavə və dəyişikliklər Avropa Şurasının Venesiya Komissiyası ilə tam razılaşdırılıb. "Hakim Yeni Azərbaycan Partiyasının Məcəllə ilə bağlı verdiyi bütün təkliflər nəzərə alınıb" bazar ertəsi Trend a YAP icra katibinin müavini, millət vəkili Mübariz Qurbanlı deyib.
Azərbaycanda prezident seçkisi oktyabrın 15-də keçiriləcək. Seçki və səsvermə prosesinin təkmilləşdirilməsi üçün, Venesiya Komissiyası ilə Azərbaycan hökumətinin birgə müzakirələri nəticəsində, Seçki Məcəlləsinə əlavə və dəyişikliklər edilib.
Dəyişikliklərə əsasən, prezidentliyə namizədlərin təbliğatı üçün Seçki Fondunun məbləği 10 milyon manata qədər artırılıb. Millət vəkilliyinə namizədlər üçün isə Seçki Fondunun miqdarı 500 min manat olacaq.
Azərbaycanın Seçki Məcəlləsinin əvvəlki variantının 191-ci maddəsinə əsasən, dövlət büdcəsindən prezidentliyə namizədlərin seçki kampaniyasına maliyyə vəsaiti ayrılır və bu məbləğ şərti maliyyə vahidinin bir milyon mislindən çox olmamalıdır. Səslərin 3 faizindən azını toplayan namizədlər həmin məbləği sonra dövlət büdcəsinə geri qaytarmalıdırlar.
Azərbaycanda şərti maliyyə vahidinin (1,1 manat) bir milyon misli - 1, 1 mln. manat edir.
Millət vəkillərinə isə, şərti maliyyə vahidinin 75 min misli - 82,5 min manat ayrılırdı.
Məcəlləyə edilən digər dəyişikliyə görə isə namizədlərin dövlət televiziyası və mətbuat orqanında təbliğatına qadağa qoyulub.
Məcəllənin əvvəlki variantında isə prezidentliyə namizədlər üçün dövlət televiziyasında (AzTV) və radiosunda 6 saat müddətində pulsuz efir vaxtı verilirdi.
Müxalifət dəyişikliklərə etiraz edir və bu dəyişikliklərin qeyri-demokratik xarakter daşıdığını bəyan edir.
Qurbanlı müxalifətin iddiaları ilə razılaşmayıb. "Heç yerdə seçki kampaniyası televiziyalarda pulsuz təbliğ olunmur. Bütün bunlar sosialist sistemindən qalmışdı. Kim istəyir təbliğatını qursun, özəl kanallarda bunu edə bilər" Qurbanlı əlavə edib.
YAP 1992-ci ildə Naxçıvanda keçmiş prezident Heydər Əliyev tərəfindən təsis olunub. Yaranmsından 6 ay sonra hakimiyyətə gələn və hazırda da iqtidarda olan partiyanın indiki sədri prezident İlham Əliyevdir.
Məqalə müəllifi ilə əlaqə ünvanı: [email protected]