Azərbaycan, Bakı, 23 may/ Trend , müxbir İ.Əlizadə/ Azərbaycan, Gürcüstan və Ermənistanın təmsil olunduğu Cənubi Qafqaz Parlament Təşəbbüs Qrupunun yaradılmasının təşəbbüskarları hesab edirlər ki, qrupun fəaliyyətini davam etdirməsi vacibdir. "Cənubi Qafqaz Parlament Təşəbbüs Qrupu səmərəli fəaliyyət göstərib və qrupun işini davam etdirməsi Cənubi Qafqazın hər üç ölkəsinin maraqlarına cavab verir", - deyə cümə günü Trend -a eksklüziv açıqlamasında Böyük Britaniyanın LİNKS Qeyri-Hökumət təşklatının rəhbəri Dennis Sammut bildirib.
Trend -un arayışı: Böyük Britaniyanın LİNKS Qeyri-Hökumət təşkilatının vasitəçiliyi ilə bir neçə il əvvəl Azərbaycan, Gürcüstan və Ermənistan nümayəndələrindən ibarət Cənubi Qafqaz Parlament Təşəbbüs Qrupu yaradılıb. Hazırda Cənubi Qafqaz Parlament Təşəbbüs Qrupuna Azərbaycan rəhbərlik edir. Lakin bir ilə yaxındır ki, qrupun iclasları keçirilmir. İclasların keçirilməməsi Ermənistanda ötən ilin mayında baş tutan parlament seçkilərindən sonra bu ölkənin qrupdakı nümayəndə heyətinin formalaşdırılmaması ilə bağlıdır. Razılaşmaya görə, iclaslar altı aydan gec olmayaraq keçirilməlidir.
Bəzi məlumatlara görə, Cənubi Qafqaz ölkələri Parlament Təşəbbüs Qrupunun fəaliyyətini davam etdirməsində maraqlı deyillər.
"Gürcüstanın yeni seçilən parlamentinin fəaliyyətə başlamasını gözləyirik. Parlament fəaliyyətə başlayandan sonra Cənubi Qafqaz Parlament Təşəbbüs Qrupunun iclasları bərpa olunacaq", - deyə Sammut əlavə edib.
Onun sözlərinə görə, Azərbaycan, Gürcüstan və Ermənistan qrupun fəaliyyətini davam etdirməsində maraqlıdır: "Qrup problemlərin müzakirəsi və onların həlli yollarının tapılması üçün yaradılıb. Hər üç ölkənin üzləşdikləri problemlər eynidir. Ona görə də qrupun fəaliyyətini davam etdirməsi zəruridir".
Məqalə müəllifi ilə əlaqə ünvanı: [email protected]
