Azərbaycan, Bakı, 06 iyun/ Trend , müxbir A.Qasımova/ Avropa İttifaqının Ali komissarı Havyer Solananın Gürcüstana səfəri Abxaziya ilə bağlı Gürcüstan və Rusiya arasında münasibətlərin ətrafında yaranmış vəziyyəti, çətin ki, dəyişəcək. Aİ-ə üzv olan hər bir ölkənin Rusiyaya münasibətdə fərdi rəyinin olması nəzərə alınsa, Solananın Gürcüstana səfəri bu ölkədə gərgin vəziyyəti çətin ki dəyişsin. Avropalı ekspert Robert Şepard belə hesab edir.
Xarici siyasət və təhlükəsizlik üzrə Avropa komissarı Solana Gürcüstan-Abxaziya münaqişəsi zonasında vəziyyəti və burada gərginliyin azaldılması imkanlarını şəxsən öyrənmək üçün iyunun 5-6-da Gürcüstana səfər edib.
"Aİ Rusiyanın Gürcüstana qarşı siyasətindən narazıdır. İş ondadır ki, Fransa, İseçvrə və Almaniya kimi əksər Avropa ölkələrinin Rusiyaya münasibətdə müxtəlif mövqeləri var", - "Times" nəşrinin Moskva bürosunun keçmiş başçısı Şepard cümə günü telefonla Trend -a bildirib. O, Avropa İttifaqının əksər üzvlərinin məsələyə müxtəlif baxışları olmasına görə, Aİ siyasətini irəlilətməyin tək Solana üçün çətin olduğunu bildirib.
"Aİ-nin Rusiya və Gürcüstana münasibətdə gələcəkdə özünün necə aparacağı hələ məlum deyil", - Şepard bildirib.
Solana Gürcüstan-Abxaziya danışıqlarının bərpa olunmasında yalnız o zaman yardım edə bilər ki, Gürcüstanı qoşunlarını Kodor dərəsindən çıxarmağa və Abxaziya ilə hücum etməmək haqqında müqavilə bağlamağa razı sala bilsin. Bu barədə Abxaziya prezidentinin mətbuat katibi Alxaz Çolokua cümə günü RİA-Novostiyə məlumat verib.
Onun sözlərinə görə, "kimin inandırmağa çalışmasından asılı olmayaraq," Abxaziya özünün xarici siyasət kursunu dəyişməyə hazırlaşmır. "Abxaziya prezidenti bu yaxınlarda bildirib ki, Rusiya Abxaziyada sabitliyin başlıca təminatçısıdır", - Çolokua söyləyib.
SSRİ dağıldıqdan sonra Gürcüstan SSR-in tərkibinə daxil olan Abxaziya və Cənubi Osetiya öz müstəqilliklərini elan ediblər. Gürcüstanın bu ərazilər üzərində nəzarəti itirməsinə gətirən hərbi münaqişədən sonra, nəticəsiz sülh danışıqları aparılır. Tbilisi onlara Gürcüstanın tərkibində geniş muxtariyyət təklif edir k i, bu da separatçıları qane etmir.
