Azərbaycan, Bakı, 19 iyun/ Trend , müxbir E.Babayev/ Azərbaycan müxalifəti bu il ölkədə keçiriləcək prezident seçkisinin legitimliyinə təsir göstərə bilməyəcək. "Azərbaycanda müxalifət sayılan qüvvələr seçkidə iştirak edəcək. Bu zaman boykotun əsas gücü olan legitimliyin şübhə altına alınması mümkün olmayacaq", cümə axşamı Trend -a politoloq Zərdüşt Əlizadə bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib. AXCP sədri Əli Kərimli bildirib ki, "Azadlıq" blokunun boykot qərarı hakimiyyətin legitimliyinə təsir göstərəcək.
Əlizadə isə hesab edir ki, bütün müxalifət boykota getsə, bu, effekt verə bilər. "1998-ci il prezident seçkisində bütün əsas müxalifət partiyaları boykot yolu tutdu. Amma Milli İstiqlal Partiyasının o zamankı sədri Etibar Məmmədov seçkilərə qoşuldu və boykotun heç bir təsiri olmadı. 2000-ci il parlament seçkilərində isə Xalq Cəbhəsi Partiyası gedib parlamentdə əyləşdi. Mənim fikrimcə, müxalifət sıralarını saxta müxalifətdən təmizləməlidir. Hesab edirəm ki, ADP sədri Sərdar Cəlaloğlu, BAXCP sədri Qüdrət Həsənquliyev, VHP sədri Sabir Rüstəmxanlı müxalifət deyil. Onlar hökumətlə əməkdaşlıq edirlər", - deyə o qeyd edib.
Məqalə müəllifi ilə əlaqə ünvanı: [email protected]
