Azərbaycan, Bakı, 21 iyun/ Trend müxbir C.Babayeva/ Azərbaycanda prezidentliyə namizədlərin yeni siyasi bloku yaradılır. Yaşıllar Partiyasının həmsədri, prezident seçkisində iştirak etmək barədə qərar qəbul etmiş Mais Güləliyevin şənbə günü Trend -a verdiyi məlumata əsasən, yeni siyasi blokda Yaşıllar Partiyası və müxalifət partiyalarının "beşlər" formatında təmsil olunan iki partiya təmsil olunacaq.
Trend -un arayışı: Azərbaycanın müxalifət partiyalarının "beşlər" formatı ötən il yaradılıb və qurumda Azərbaycan Demokrat, Müsavat, Tərəqqi, Milli İstiqlal partiyaları və "Azərbaycan Naminə" İctimai Forum təmsil olunur. Qurumda təmsil olunan Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun namizədliyi təmsil olunduqları partiyalar tərəfindən irəli sürülüb. "Azərbaycan Naminə" İctimai Forumun rəhbəri Eldar Namazov namizədliyini müstəqil şəkildə irəli sürüb.
Güləliyevin sözlərinə görə, yeni yaradılacaq siyasi blok perspektivi olmayan "beşlər" formatını parçalayacaq. "Formatda təmsil olunan Müsavat partiyasının sədri İsa Qəmbər birliyin tərəfdarı olmadığını sübut edib. Yaşıllar Partiyası "beşlər" formatında təmsil olunmaq üçün 3-4 dəfə müraciət etsə də, məhz Qəmbərə görə həmin qurumda təmsil olunmağımız məhdudlaşdırılıb. Yaşıllar Partiyasının "beşlər" formatında təmsil olunması məsələsi artıq qapanıb",- deyə Partiya sədri bildirib.
Onun bildirdiyinə görə, siyasi blokun fəaliyyəti üç istiqamətdə mümkün olacaq. "Blokda təmsil olunacaq prezidentliyə üç namizəddən biri qeydiyyata alınarsa, iki namizəd qeydiyyatdan keçən namizədi dəstəkləyəcək. Üç namizəddən heç biri qeydiyyata alınmazsa, blok ya prezident seçkisinin birgə müşahidəsini aparacaq, ya da konsensus əsasında, müxalifətdən prezidentliyə digər namizədi dəstəkləyəcək", - deyə Güləliyev bildirib.
Yeni yaradılacaq siyasi blokun adına gəlincə, Güləliyev bildirib ki, həmsədri olduğu partiya qurumun "Yaşıl Siyasət" bloku adlandırılmasını təklif edib. "Adla bağlı başqa təkliflər olarsa, qəbul edə bilərik. Qurumun adı əsas deyil, əsas məsələ, yeni yaradılacaq siyasi blokun birlik imitasiyası yaratmayaraq, əsl birlik kimi fəaliyyət göstərməsi olacaq", - deyə o qeyd edib.
Onun sözlərinə görə, yaxın günlərdə yeni siyasi blokun ictimai təqdimatı keçiriləcək.
"Beşlər"də təmsil olunan Azərbaycan Demokrat Partyasının sədri Sərdar Cəlaloğlu şənbə günü Trend -a yeni yaradılacaq siyasi blok barədə məlumatlı oldmadığını bildirib.
"Azərbaycan Naminə" İctimai Forumun rəhbəri Eldar Namazovun şənbə günü Trend -a bildirdiyinə görə, birliklə bağlı müxtəlif formatlar təklif olunub və bu istiqamətdə müzakirələr davam etdirilir. Onun bildirdiyinə görə, yekun qərar olandan sonra, bu məsələ ilə bağlı açıqlama verəcək.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi partiyasının sədri Qüdrət Həsənquliyevin, Müasir Müsavat partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtidaryönlü "Ana Vətən" və Sosial Rifah partiyaları prezidentliyə İlham Əliyevin namizədliyini irəli sürüb. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Məqalə müəllifi ilə əlaqə saxlamaq üçün ünvan - [email protected]
