Azərbaycan, Bakı, 24 iyun/ Trend , müxbir E.Babayev/ Azərbaycanın müxalif Xalq Cəbhəsi Partiyasının qurultayı bu il keçirilməyə bilər. "Düzdür, biz çalışırıq ki, qurultay bu il keçirilsin, amma rayon təşkilatlarında qurultaya hazırlıq üzrə konfransların keçirilməsinə hakimiyyət qurumları tərəfindən maneələr törədilir", bunu çərşənbə axşamı jurnalistlərə AXCP sədri Əli Kərimli deyib.
Trend -un arayışı: AXCP-nin qurultayında əsasən təşkilati məsələlərə yer ayrılması nəzərdə tutulur. Partiyanın sədri hesabat verdikdən sonra partiyanın yerli strukturlarına seçkilər keçiriləcək.
Kərimli hansı rayonlarda qurultaya hazırlıq üzrə konfranslara maneə yaradıldığını açıqlamayıb. "Konfranslar rayonların heç olmasa 80 faizində keçirildikdən sonra qurultayın vaxtı müəyyən olunacaq. Çox çətinliklə bu proses gedir. Hər halda çalışırıq ki, qurultay bu il baş tutsun", - deyən Kərimli AXCP-nin qərargah problemi ilə bağlı da hər hansı yeniliyin olmadığını bildirib.
Məqalə müəllifi ilə əlaqə ünvanı: [email protected]
