Azərbaycan, Bakı, 25 iyun/ Trend , müxbir E.Məmmədov/ Azərbaycanın Silahlı Qüvvələrinin 90 illik yubileyilə əlaqədar Naxçıvan Qarnizonunun "N" saylı Hərbi Hissəsinin hava hücumundan müdafiə bölməsində yeni Əsgər Tədris-Texniki Yaşayış-Məişət Kompleksi istifadəyə verilib. Yeni kompleksdə 100 yerlik əsgər yataqxanası və 100 yerlik əsgər yeməkxanası, tibb otağı, ərzaq anbarı, qazanxana fəaliyyət göstərəcək.
Trend -un arayışı: 1918-ci il iyunun 26-da Azərbaycan Xalq Cümhuriyyəti tərəfindən Əlahiddə Azərbaycan Korpusu təşkil olunub. Azərbaycan prezidentinin 22 may 1998-ci il fərmanı ilə hər il iyunun 26-sı Azərbaycanın Silahlı Qüvvələr Günü kimi qeyd edilir. Silahlı Qüvvələrin 90 illik yubileyilə əlaqədar iyunun 26-da Bakının "Azadlıq" meydanında hərbi parad keçiriləcək.
Kompleksdə həmçinin iki mərtəbəli tədris-texniki mərkəzi də fəaliyyət göstərəcək. Mərkəzin birinci mərtəbəsində idman zalı, əşya anbarı, avtomobillərə texniki qulluq sexi, 2-ci mərtəbədə isə ideoloji otaq, taktiki, texniki sinif otaqları yerləşir.
Yeni kompleksin açılışından sonra Azərbaycan Silahlı Qüvvələrinin yaranmasının 90 illik yubileyi münasibətilə Naxçıvan MR-də ordu quruculuğu və vətənin müdafiəsində fərqlənən bir qrup zabit, gizir, çavuş və əsgərlərə Naxçıvan MR Ali Məclisinin fəxri fərman və qiymətli hədiyyələri təqdim olunub.
Məqalə müəllifi ilə əlaqə ünvanı: [email protected]