Azərbaycan, Bakı, 25 iyun/ Trend , müxbir İ.Əlizadə/ Azərbaycanın müxalifət partiyalarının təmsil olunduğu "Beşlər" formatı ilə "Azadlıq" blokunun əməkdaşlığına dair danışıqlar aparılır. "İki birlik arasında əməkdaşlığın baş tutması etimalı böyükdür və hazırda bununla bağlı müzakirələr davam edir", - deyə çərşənbə günü Trend -a açıqlamasında "Beşlər" formatında təmsil olunan Tərəqqi Partiyasının sədri Çingiz Dəmiroğlu bildirib.
Trend -un arayışı: "Beşlər" formatında Müsavat, Demokrat, Tərəqqi, Milli İstiqlal partiyaları və "Azərbaycan Naminə" İctimai Forum təmsil olunur. Bu birlikdə təmsil olunan Müsavat, Demokrat partiyaları və "Azərbaycan Naminə" İctimai Forumun prezidenti Eldar Namazov oktyabrın 15-də keçiriləcək prezident seçkilərində iştirak etmək haqda qərar qəbul ediblər.
"Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur. Blok prezident seçkilərinin boykot olunması haqda qərar qəbul edib.
"Seçki Məcəlləsinə və "Sərbəst toplaşmaq azadlığı haqqında" qanunlara edilən dəyişikliklərdən sonra boykot tərəfdarlarının arqumentləri güclənib və "Beşlər" formatında təmsil olunan partiyaların prezident seçkilərini boykot etməsi etimalı artıb. Ona görə, də "Beşlər" formatı ilə "Azadlıq" blokunun boykot məsələsində ortaq mövqeyə gəlməsi və əməkdaşlıq etməsi mümkündür", - deyə partiya sədri bildirib.
Dəmiroğlu qeyd edib ki, iki müxalifət birliyi arasında vasitəçilik missiyasını öz üzərinə götürüb. Onun sözlərinə görə, "Beşlər" formatının üzvü olan ADP sədri Sərdar Cəlaloğlu bir necə dəfə iki birlik arasında vasitəçilik etmək istəsə də, bu, müsbət nəticə verməyib.
"Son vaxtlar çox çalışmışıq ki, "Azadlıq" bloku ilə bir yerdə olaq və ən azı müxalifətin 7-8 partiyasının təmsil olunduğu daha güclü bir qurum yaradaq. Ancaq bu birlik "Azadlıq" blokunun günahı ucbatından baş tutmur və onlar qəti şəkildə bu birliyin əleyhinə çıxış edirlər", - bazar ertəsi "Beşlər" formatında təmsil olunan Azərbaycan Demokrat Partiyasının (ADP) sədri Cəlaloğlu deyib.
"Azadlıq" blokunun üzvü olan AXCP-nin sədr müavini Həsən Kərimov isə jurnalistlərə bildirib ki, "Beşlər" formatında təmsil olunan siyasi qüvvələr birmənalı şəkildə boykot qərarı versələr, əməkdaşlıq məsələsi nəzərdən keçirilə bilər. İndiki halda isə əməkdaşlıq mümkün deyil.
Məqalə müəllifi ilə əlaqə ünvanı: [email protected]
