Azərbaycan, Bakı, 30 iyun / Trend , müxbir İ.Əlizadə/ Avropa Şurası Azərbaycanda prezident seçkilərinin azad və ədalətli keçirilməsinə dəstək üzrə fəaliyyət planı hazırlayıb. "Fəaliyyət planında bir sıra tədbirlər, o cümlədən Avropa Şurasının maarifləndirmə xarakteri daşıyan "Seçkilər və media üzrə təlimat" kitabının Azərbaycan dilinə tərcüməsi və nəşr edilməsi, aşağı seçki komissiyaları üçün təlim, milli müşahidəçilər üçün seminarların keçirilməsi nəzərdə tutulub", - deyə Trend -a Avropa Şurasının Katibliyindən məlumat verilib.
Trend -un arayışı: Azərbaycanda prezident seçkisi oktyabrın 15-də keçiriləcək.
Katiblikdən verilən məlumata görə, Avropa Şurası Azərbaycanda media üzrə fəaliyyət planı hazırlamağı da nəzərdə tutur. Fəaliyyət planında elektron və yazılı mətbuat sahəsində çalışan jurnalistlərin peşəkarlıq səviyyəsinin artırılması ilə bağlı təlimlərin keçirilməsi, o cümlədən qanunvericiliyin öyrənilməsi və digər məsələlər nəzərdə tutulur.
Məlumatda qeyd olunub ki, hazırda Azərbaycanla bir sıra əməkdaşlıq proqramları həyata keçirilir. Həmin proqramların bir qismi Avropa Komissiyası ilə birgə reallaşdırılır. Bu proqramların həyata keçirilməsinə maliyyə vəsaiti Avropa Komissiyası tərəfindən ayrılır, onların həyata keçirilməsini isə Avropa Şurasının təyin etdiyi ekspertlər təmin edirlər. Bunlardan biri Cənubi Qafqaz, Ukrayna və Moldovada "İnsan hüquqları mədəniyyətinin təşviqi" adlı proqramdır. Hazırda həyata keçirilən Cənubi Qafqaz, Ukrayna və Moldovada insan hüquqları mədəniyyətinin təşviq edilməsi üzrə birgə proqram çərçivəsində sosial sahə, prokurorluq, polis orqanları, habelə Avropa İnsan Haqları Məhkəməsi yanında hökumətin səlahiyyətli nümayəndəsinin ofisinin gücləndirilməsi və Ombudsman Aparatının imkanlarının artırılması kimi layihələr nəzərdə tutulub və həyata keçirilir.
Məqalə müəllifi ilə əlaqə ünvanı: [email protected]
