Gürcüstan, Batumi, 01 iyul/ Trend , müxbir N.Kirtsxaliya/GUAM-ın Baş katibi Valeri Çeçelaşvili bir il ərzində Azəbaycanın təşkilata katibliyini "müsbət" qiymətləndirib.
"Azərbaycanın katiblik etməsi nəqliyyat təminatı və münaqişələrin tənzimlənməsi məsələlərində xeyli irəliləyişin olması deməkdir", - Trend -a bu gün Çeçelaşvili bildirib.
Baş katib qeyd edib ki, Batumi sammitində beynəlxalq subyektlərlə təşkilatdankənar əməkdaşlıqla bağlı beynəlxalq nəqliyyat məsələləri üzrə kommyunike imzalanacaq. "Bu məqsədlə Batumi sammitində Beynəlxalq Nəqliyyat Şurasının ratibi cənab Marm iştirak edir", - deyən Çeçelaşvili əlavə edib ki, GUAM ölkələri üçün yeni marşrutların yaranması gələcəkdə ümumilikdə təşkilatın inkişaf etməsi istiqamətində yaxşı perspektivdir.
Münaqişəli məsələlərin həllinə gəldikdə isə Çeçelaşvili deyib ki, Azərbaycanın GUAM-da katibliyi ərzində hazırda BMT çərçivəsində fəal müzakirə edilən "dondurulmuş münaqişlər" üzrə təşkilatın yaradılması təşəbbüsü irəli sürülüb.
"Bundan başqa, mən Baş katib kimi, Azərbaycan Xarici İşlər Nazirliyi ilə GUAM Katibliyinin müsbət əməkdaşlığını qeyd etmək istəyirəm", - Çeçelaşvili deyib.
Baş katib təşkilatda Gürcüstanın katibliyi ərzində GUAM-ın fəaliyyətinin daha da effektiv olacağına ümid etdiyini bildirib."Bunu mən gürcü olduğum üçün demirəm. GUAM-ın tam şəkildə regional təşkilata çevrilməsində mövcud olan əsas bunu göstərir ki, Azərbaycanın katibliyi burada öz rolunu oynayıb", - Çeçelaşvili qeyd edib.
Onun sözlərinə görə, təşkilatın son illərdəki fəaliyyətini Batumi sammitinin iştirakçıları da qiymətləndirəcəklər. Bu da yekun bəyannamədə öz əksini tapacaq.
