Azərbaycan, Bakı, 17 iyul/ Trend , müxbir C.Babayeva/ Azərbaycanın Yaşıllar Partiyasının təklifi ilə yaradılması nəzərdə tutulan prezidentliyə namizədlərin yeni "Yaşıl Siyasət" bloku ilə bağlı aparılan danışıqlarda fikir ayrılığı yaranıb. Yaşıllar Partiyasının həmsədri, prezident seçkisində iştirak etmək barədə qərar qəbul etmiş Mais Güləliyevin cümə axşamı Trend -a bildirdiyinə görə, blok ideyasının reallaşmasında yeganə çatışmazlıq var. "Müxalifət partiyalarının "beşlər" formatında təmsil olunan siyasi təşkilat rəhbərləri yeni blokda təmsil olunmaları üçün mənim namizədliyimi onların xeyirlərinə geri götürməyimi istəyirlər. Mən də buna razı olmuram, çünki Yaşıllar Partiyasının ideyası Azərbaycanda mövcud olan bütün siyasi partiyaların ideyasından fərqlənir",- deyə Güləliyev bildirib.
Trend -un arayışı: Azərbaycanın müxalifət partiyalarının "beşlər" formatı ötən il yaradılıb. Formatda təmsil olunan Tərəqqi partiyası, prezident seçkisində İlham Əliyevi müdafiə etmək barədə qərar verdiyinə görə, qurumdan çıxıb. Hazırda formatda Azərbaycan Demokrat, Müsavat, Milli İstiqlal partiyaları və "Azərbaycan Naminə" İctimai Forum təmsil olunur. Qurumda təmsil olunan Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun namizədliyi təmsil olunduqları partiyalar tərəfindən irəli sürülüb. "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Azərbaycanda prezident seçkisinin oktyabrın 15- də keçirilməsi nəzərdə tutulub.
Ötən ay Yaşıllar Partiyasının həmsədri Mais Güləliyevin Trend -a verdiyi məlumata əsasən, yaradılacaq yeni "Yaşıl Siyasət" blokunda Yaşıllar Partiyası və müxalifət partiyalarının "beşlər" formatında təmsil olunan prezident seçkisində öz namizədi ilə iştirak barədə qərar qəbul etmiş iki partiya təmsil olunacaq.
Güləliyevin sözlərinə görə, heç bir səmərəsi olmayan "beşlər" formatı avqustun əvvəlində mütləq tamamilə parçalanacaq. "Bu formata daxil olan və "yaşıllarla" birgə blok yaratmağı təklif edənlər parçalanmanı onlar etməyəcəklərini fikirləşirdilər. Yeni siyasi blokun yaradılması üçün "beşlər" formatında təmsil olunanlar formatın tamamilə parçalanmasını gözləyirlər", deyə o bildirib.
Onun fikrincə, "beşlər" normal siyasi təşkilat kimi formalaşıb fəaliyyət göstərməyib. "Hətta məşvərətçi bir qurum kimi də formalaşmamış format yalnız müəyyən proebləmlərin müzakirəsi funksiyasını daşıyırdı. "Beşlər"də Yaşıllar Partiyasının təmsil olunmasına imkan verilsəydi, partiya həmin formatın bloka çevrilməsinə kömək edəcəkdi",- deyə o əlavə edib.
Güləliyevin sözlərinə görə, uzun müddətdir fəaliyyət göstərən siyasi partiyalar yeni yaradılmış siyasi partiyalar ətrafında birləşməyi özlərinə sığışdırmırlar. "Normal cəmiyyətdə şəxsi ambisiyalar kənara qoyulub ideya əsas götürülur. Cəmiyyətin problemlərini həll edə bilən şəxslərin qabağa getməsinə imkan yaradılır. KİV bunu işıqlanqdırmasa da, bu gün cəmiyyətdə mövcud problemlərin həllini araşdıran, onu yazılı şəkildə dərc etdirən yeganə siyasi partiya Yaşıllar Partiyasıdır", deyə o qeyd edib.
Trend -un arayışı: Azərbaycanın Yaşıllar Partiyası 2007-ci ildə yaradılıb.
Məqalə müəllifi ilə əlaqə saxlamaq üçün ünvan - [email protected]
