...

Azərbaycan müxalifətinin təmsilçisi seçkidə iştirak etməyəcək

Siyasət Materials 23 İyul 2008 11:16 (UTC +04:00)

Azərbaycan, Bakı, 23 iyul/ Trend , müxbir E.Babayev/ Azərbaycanın müxalif millət vəkili, Azad Demokratlar Birliyi Təşkilat Komitəsinin sədri Əli Məsimli qarşıdan gələn prezident seçkisində başqa bir namizədi dəstəkləmək qərarına gəlib. "Əgər bizim formalaşdırmaq istədiymiz Azad Demokratlar Birliyi Partiyası tam fəaliyyətə başlasaydı, bu seçkilərdə partiya olaraq iştirak edə bilərdik. Ona görə də indiki halda seçkidə birbaşa yox, dolayısı yolla iştirak edəcəyik", çərşənbə günü Trend -a Məsimli bildirib.

Trend -un arayışı: Azərbaycanda növbəti prezident seçkisinin oktyabrın 15-də keçirilməsi nəzərdə tutulur. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtidaryönlü Ana Vətən və Sosial Rifah partiyaları seçkidə İlham Əliyevin namizədliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə qərar verib.

Məsimli vurğulayıb ki, seçkidə iştirak edəcək başqa bir namizədi müdafiə edəcək. "Namizədlərin seçki proqramları açıqlandıqdan sonra götür-qoy edib, hansı namizədi müdafiə edəcəyimizi müəyyənləşdirəcəyik" - deyən Məsimli indiyə qədər Azad Demokratlar Birliyi Partiyasının tam fəaliyyətə başlamamasının səbəblərinə isə belə aydınlıq gətirib: "Süni yolla partiya yaratmaq fikrimiz olmadığına görə, təşkilatın tam formalaşması ləng gedir".

Məsimli 1991-ci ildən Azərbaycan Prezidenti Aparatının İqtisadiyyatın idarə edilməsinin təşkili şöbəsinin bölmə midiri, Sosial-iqtisadi inkişaf şöbəsinin baş məsləhətçisi, 1992-ci ildən Azərbaycan Xarici İnvestisiyalar Komitəsinin sədri, Azərbaycan Respublikası Baş nazirinin birinci miavini, Dövlət İqtisadiyyat və Planlaşdırma Komitəsinin sədri, Baş nazir əvəzi, iqtisadiyyat naziri, 1993-2005-ci illərdə "Mistəqil İqtisadçılar Birliyi" ictimai təşkilatının prezidenti vəzifələrində çalışıb. Uzun müddət Xalq Cəbhəsi partiyasında rəhbər strukturlarda çalışan Məsimli 2003-ildən sonraAzad Demokratlar Birliyi Partiyasının yaradılması niyyəti ilə Təşkilat Komitəsi yaradıb. 2005-ci il noyabrın 6-da 113 saylı Şəki şəhər seçki dairəsindən deputat seçilib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti