Azərbaycan, Bakı, 31 iyul / Trend , müxbir G.Əhmədova, D.Xatınoğlu/ Pakistan ABŞ -ın regiondaterrorizmlə mübarizədə bir nömrəli müttəfiqi olsa da, bu məsələdə bir sıra öhdəlikləri yerinə yetirməkdə tərəddüd edir.
" Pakistan 2001- ci ildən etibarən regionda terrorizmlə mübarizədə ABŞ -ın bir nömrəli müttəfiqi olub. Lakin hazırda bəzi məqamlara görə Pakistan ABŞ-la tam əməkdaşlıq edə bilmir",- deyə İslamabaddan telefonla pakistanlı politoloq Əbdulənis Həy Trend -a bildirib.
Pakistan baş naziri Yusuf Rza Gilani iyulun 28 - də ABŞ -a səfər edib. BBC-nin məlumatına əsasən, ABŞ prezidenti Corc Buşla Gilaninin görüşündə, rəsmi Vaşinqton İslamabadı Taliban və əl-Qaidə terror təşkilatlarına Pakistan hökumətinin ciddi təzyiq göstərməməsini tənqid edib. Görüşdə Gilani bildirib ki, Pakistan yenə də terrorizmlə mübarizədə ABŞ-ın bir nömrəli müttəfiqləri sırasındadır və bundan sonra da belə olmasını istəyir.
Həyin sözlərinə görə, ABŞ Əfqanıstanı işğal edəndən sonra, Pakistanın bəzi maraqlarına etinasız yanaşıb.
ABŞ və Əfqanıstan rəsmiləri dəfələrlə Pakistan ordusunda və kəşfiyyat orqanlarında Talibanın fəaliyyətini və Əfqanıstanın sabitliyini pozmaq cəhdlərini pisləyiblər. "Pakistanın Baş naziri Yusuf Rza Gilaninin ABŞ-a səfəri də bu problemləri aradan qaldırmaq üçün təşkil olunub. ABŞ yenə də Pakistana öz müttəfiqi kimi baxır və belə cüzi problemlər üzündən, maliyyə yardımları kəsilməyəcək",- o İslamabaddan telefonla bildirib.
Həyin fikrincə, Pakistan ordusunda və kəşfiyyat orqanlarında Talibana bağlı şəxslərin olmasını danmaq olmaz, lakin, onların Əfqanstanın təhlükəsizliyini pozmaq qabiliyyətləri və gücləri yetərli deyil.
Amerikalı ekspert Corc Perkoviç isə, hesab edir ki, Pakistan ona görə bir sıra çətinliklərlə üzləşir ki, Əfqanıstanla sərhəddə yaşayan əhali Pakistan hökumətinə deyil, tayfa və tarixlərinə sadiqdir.
"Pakistan hərbi əməliyyatlarına qarşı çıxanların daxildə də olması istisna olunmur. Fiziki olaraq, döyüşçülərin yaşadığı ərazilərə daxil olmaqçox çətindir. Bu ərazilərə Pakistan höküməti və digər dövlətlərin heç vaxt nəzarət etməməsinin də səbəbləri var", - deyə ABŞ-ın "Beynəlxalq sülh üzrə Karnegi ianəsi" Mərkəzinin qlobal təhlükəsizlik məsələləri üzrə vitse-prezidenti və nüvə məsələləri üzrə proqramın direktoru Perkoviç elektron poçt vasitəsilə Trend -a bildirib.
Onun sözlərinə görə, Amerika qüvvələri Pakistanla sərhəddə hərbi əməliyyatlar keçirirlər və bu da Talibanın Pakistan daxilində ixtişaş yaratması ilə nəticələnir.
ABŞ -ın hərbi əməliyyatları zamanı öldürülənlər dinc sakinlər olanda ixtişaşlar daha da güclənir. Amma Pakistanda fəaliyyət göstərən misirli, özbək və digər qeyri-puştun olan "Əl-Qaidə" üzvlərinin öldürülməsinə Pakistan əhalisi bir o qədər də reaksiya vermir",- deyə "Hindistanın nüvə bombası" adlı məşhur kitabın müəllifi Perkoviç bildirib.
ABŞ-ın Pakistana yardımına gəlincə isə, Perkoviç hesab edir ki, bu yardım hər hansı bir Amerika yardımının təsir etmədiyi qədər, ən yaxşı təsirə malikdir.
"Lakin ABŞ bunu Pakistan prezidenti Pərviz Müşərrəf və digərlərinə qarşı təzyiq rıçaqı kimi istifadə edə bilmədi ki, Pakistanın nəzərini ölkənin hüdudlarında fəaliyyət göstərən ekstremistlərlə mübarizəyə cəmləşdirməyə yönəltsin", - deyə amerikalı ekspert bildirib.
Ekspertlər bu məsələdə Hindistanın da təsirinin olduğunu düşünürlər. Pakistanlı ekspert Heyin fikrincə, Taliban hakimiyyətinin devrilməsindən sonra, rəsmi İslamabadın bir nömrəli strateji düşməni olan Hindistanın Əfqanıstanda böyük nüfuzu varvə bü gün də belədir,ki, bu da Pakistanın təhlükəsizliyini pozur.
"Bu problemlər ABŞ və Pakistanın terrorizmlə mübarizədə fikir ayrılığının yaranmasına gətirib çıxarmışdı" - deyə pakistanlı ekspert bildirib.
Adının çəkilməsini istəməyən Əfqanıstan Prezident Admnistrasiyasının rəsmisi isə, hesab edir ki, Hindistanın Əfqanıstanda fəaliyyət göstərməsi Pakistanın təhlükəsizliyini poza bilməz.
"Bizə gün kimi aydındır ki, Pakistan Əfqanııstanı "əlaltısına" çevirmək istəyir və bu hakimiyyət terrorizmlə mübarizədə ciddi deyil. Taliban Pakistan kəşfiyyatı və ordusu tərəfindən silahlanır, maliyyə dəstəyi alır və təlim görür" - deyə, əfqan rəsmisi cümə axşamı elektron poçt vasitəsilə Trend -a bildirib.
İyulun 30 - da New-York Times qəzeti məlumat yayıb ki, Amerika Mərkəzi Kəşfiyyat İdarəsi (CİA) Pakistan xüsusi xidmət orqanının(İSİ) bəzi üzvlərinin Taliban və əl- Qaidə ilə əməkdaşlıq etməsi haqda Pakistan hakimiyyətinə yeni sübut lazımdır.
Məqalə müəllifi ilə əlaqə saxlamaq üçün elektron ünvan [email protected]
