Azərbaycan, Bakı, 15 sentyabr / Trend , müxbir S.İsmayılbəyli/ Azərbaycanın İctimai Televiziya və Radio Şurası (İTV) Mərkəzi Seçki Komissiyasının (MSK) prezidentliyə namizədlərə həftə ərzində 6 saat pulsuz efir vaxtının verilməsi təklifi ilə razıdır, şirkətin rəhbəri İsmayıl Ömərov bazar ertəsi Trend -a bildirib.
"Mərkəzi Seçki Komissiyası qanunvericiliyə uyğun olaraq hər hansı təklif irəli sürürsə, biz buna razı olmalıyıq", - Ömərov əlavə edib.
Trend -un arayışı: Azərbaycanda prezident seçkiləri oktyabrın 15-də keçiriləcək. MSK hakim Yeni Azərbaycan Partiyasının (YAP) sədri, hazırki dövlət başçısı Ilham Ə liyev, müxalif Ümid Pariyasının sədri Iqbal Agazadə, Böyük Quruluş Partiyasının sədri Fazil Qəzənfəroglu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəylinin prezidentliyə namizədliyini qeydə alıb.
İTV ilə MSK arasında aparılan ilkin danışıqlar zamanı prezidentliyə namizədlərə həftə ərzində 3 saat pulsuz efir vaxtının verilməsi müzakirə olunurdu.
Ömərov deyib ki, həftə ərzində prezidentliyə namizədlərə 3 saat İctimai Televiziya və Radio Şurasının televiziyasında, 3 saat isə radiosunda veriləcək. Onun sözlərinə görə, namizədlərin canlı çıxışı və debatlar üçün artıq studiyaların hazırlığı başa çatdırılıb, müasir texnikalar quraşdırılıb. Ömərov deyib ki, prezidentliyə namizədlərin istəyi ilə İTV-də pullu efir vaxtı da ayrılacaq.
İTV-də pullu efir vaxtı həftənin I-IV günlərində, müxtəlif vaxtlarda saniyəsi 10 manatdan 40 manata qədər olacaq. İctimai Radioda isə bunun həftənin I-IV günlərində, müxtəlif vaxtlarda saniyəsi 5 manatdan 13 manata qədər olması nəzərdə tutulub.
Məqalə müəllifi ilə əlaqə ünvanı: [email protected]