Azərbaycan, Bakı, 29 oktyabr/ Trend , müxbir A.Hüseynbala/ Azərbaycanın Müsavat Partiyası Məclisinin üzvü hesab edir ki, ölkədə olan müxalifət siyasi qüvvə deyil.
"Müxalifət adına iddia edən siyasi hərəkatların hansı formada birləşməsindən asılı olmayaraq, gücləri sıfıra yaxındır", - çərşənbə günü Trend -a müxalif Müsavat Partiyası Məclisinin üzvü, politoloq Hikmət Hacızadə bildirib.
Trend - un arayışı: Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasının yaranması baş tutmur.
Politoloq Zərdüşt Əlizadə isə Trend -a bildirib ki, Azərbaycan müxalifəti liderlərinin bir amal naminə birləşməsi mümkün deyil.
"Bizim müxalifət liderlərinin yeganə amalı şəxsi mənafeləri və şəxsi karyeralarını qorumaqdır", - Əlizadə deyib.
Əlizadənin sözlərinə görə, müxalifət liderlərinin amalları da müxtəlif olduğu üçün heç vaxt milli maraqlar naminə birləşə bilmirlər.
"Mən düşünürəm ki, yeni birlik yaransa belə, heç bir nəticəsi olmayacaq. İndiki müxalifət liderlərinin bir çoxu ilə Azərbaycan Xalq Cəbhəsi yarananda bir yerdə olmuşam. O zaman tərəzinin bir gözünə Vətən, Qarabağ, digər gözünə vəzifə, yaxud ötəri mənafe qoyulanda həmin adamlar ikincini seçirdilər", - Əlizadə deyib.
Politoloqun fikrincə, müxalifətin indiki liderləri xalq üçün heç bir müsbət addım atmaq qabiliyyətində deyillər.
"Onların indiki birlik iddiaları da bir tamaşadır. Müxalif liderlər azsaylı tərəfdarlarına təskinlik vermək üçün hansısa işlə məşğul olduqlarını göstərmək istəyirlər. Əslində heç bir işlə məşğul deyillər", - Əlizadə vurğulayıb.
"Müsavat Partiyasının daxilində müəyyən problemlər yarandığından, Hikmət Hacızadə belə pessimist açıqlama verir", - çərşənbə günü Trend -a müxalif Azərbaycan Demokrat Partiyasının sədri Sərdar Cəlaloğlu bildirib.
Onun sözlərinə görə, bir neçə gün əvvəl "Yeni Müsavat" qəzetinin baş redaktoru Rauf Arifoğlu da buna bənzər açıqlama verib: "Rauf Arifoğlu deyirdi ki, hakimiyyətə gələ bilməyən liderlər öz postlarını tərk etməlidir. Görünür, Müsavat funksionerlərinin bu cür bəyanatlarla çıxış etməsi daha çox partiyadaxili proseslərlə, daha doğrusu münaqişələrlə bağlıdır. İsa Qəmbərdən sonra Müsavat başqanlığı uğrunda mübarizə gedir", - Cəlaloğlu deyib.
ADP sədrinin fikrincə, Azərbaycanda kifayət qədər güclü müxalifət var: "İndiki şəraitdə demokratik üsullarla bundan artıq nəticə əldə etmək mümkün deyil. Biz bütün dünyaya qarşı mübarizə apara bilmərik. Ona görə Hacızadə kimi müxalifəti yox, xalqı və Azərbaycan hakimiyyətinə dəstək verən beynəlxalq ictimaiyyəti qınamaq lazımdır", - Cəlaloğlu qeyd edib.
Məqalə müəllifi ilə əlaqə ünvanı: [email protected]