Azərbaycan, Bakı, 04 noyabr / Trend , müxbir İ.Əlizadə / Azərbaycanın müxalifətyönlü "Yeni Müsavat" qəzetinin baş redaktoru Rauf Arifoğlu prezident seçkisindən sonra müxalifətin birliyinin yaradılması üçün görülən işlərdən narazıdır.
"Təssüf ki, atılan addımlar məhdud bir çevrənin bir araya gəlməsi və ya belə bir görüntü yaratmaq istiqamətindədir. Hazırkı vəziyyətə uyğun və real əməkdaşlıq formatı tapmaq üçün heç bir addım atılmır", - bu barədə çərşənbə axşamı Trend -a Arifoğlu bildirib.
Trend - un arayııı: Oktyabrın 15-də Azərbaycanda keçirilən prezident seçkisindən sonra müxalifətin daha geniş koalisiyada birləşməsi istiqamətində danışıqlar başlayıb. Lakin qarşılıqlı ittihamlar nəticəsində hələ ki, müxalifətin geniş koalisiyasının yaranması baş tutmur.
Baş redaktorun fikrincə, müxalifətin birləşmək imkanları indi də var. O qeyd edib ki, ölkədə narazı elektoratı öz ətrafına toplaya biləcək yeni birliyə ehtiyac yaranıb və bunu həyata keçirmək lazımdır. Lakin müxalifət real birlik yaratmaq üçün heç bir addım atmır.
"Hakimiyyət nümayəndələrinin prezident seçkisinin nəticələri ilə bağlı çox ciddi səhvlərindən sonra ənənəvi müxalifətin meydanda qalması və əsas rollardan birini daşıması üçün çox ciddi şərait yaranıb. Prezident seçkisindən sonra ənənəvi müxalifət ən azı mənəvi qələbə əldə etdi ki, əsil və əsas müxalifət onlardır. Ona görə də ənənəvi müxalifət imkanlarını, şansını, rolunu və mövqeyini bir daha nəzərə çapdırmaq imkanı qazanıb", - Arifoğlu əlavə edib.
Arifoğlu deyib ki, əgər müxalifət liderləri çevik tərpənərək bu vəziyyətdən ağılı istifadə etsələr, narazı elektoratı öz ətraflarında birləşdirə bilsələr və insanlarla işləmək taktikasını seçsələr, uğur qazana bilərlər.
Arifoğlu hesab edir ki, müxalifətin prezident seçkisində iştirak etməyib, bələdiyyə və parlament seçkilərinə hazırlaşması absurddur: "Yol verilən səhvə baxmayaraq, bələdiyyə seçkilərində iştirak etmək olar və bir ay ərzində qüvvələri toparlamaq olar. Müxalifət bu ilin sonundan başlayaraq birgə qruplar və komissiyalar yaratmalıdır ki, parlament seçkisində müəyyən uğur əldə edə bilsin. Çünki indidən yeni qurumlar yaradılmasa, təkliflər irəli sürülməsə və fəaliyyətin ideoloji əsasları formalaşdırılmasa, müxtəlif maraqlara görə müxalifətdəki insanlar dağılıb gedəcəklər. Ona görə də liderlər düşünməlidirlər ki, düşərgənin bir araya gətirilməsi üçün indidən hansısa ciddi hədəfə yönəlməli və bütün siyasi istiqamətlər nəzərə alınmaqla fəaliyyət qurulmalıdır. Əks halda, vəziyyət olduqca çətin olacaq və prezident seçkisində oluduğu kimi 2010-cu ildə də səhnəyə ya süni, ya da yarım sünü müxalifət çıxarıla bilər".
Məqalə müəllifi ilə əlaqə ünvanı: [email protected]