Azərbaycan, Bakı, 06 noyabr / Trend , müxbir S. Kazımlı / Bakının Binəqədi rayonu ərazisində baş verən qətl hadisəsinin külli miqdarda borc üstündə baş veridiyi bildirilir.
Bu gün saat 10:00 radələrində naməlum şəxs 8 - ci mikrorayonda yerləşən 23 saylı binanın qarşısında 50 yaşlı Bakı sakini Dəyanət İsmayıl oğlu Səlimova bıçaqla xəsarət yetirərək, onu öldürüb.
Binəqədi rayon Polis İdarəsindən (RPİ) cümə axşamı Trend - a verilən məlumata görə, qətl hadisəsini törədən şəxs müəyyən edilib, istintaq aparıldığından, həmin şəxsin adı açıqlanmır.
İlkin araşdırma zamanı məlum olub ki, Səlimovu öldürən şəxs 1999 - cu ildə onunla birlikdə eyni şirkətdə işləyib. Həmin müddətdə Səlimovun onu qətlə yetirən şəxsə 200 min ABŞ dolları borcu olduğu bildirilir. Qətldə şübhəli bilinən şəxs, borcunu qaytarmadığı üçün, Səlimovu öldürmək məqsədi ilə bıçaqla ona xəsarət yetirib.
O polislər tərəfindən saxlanılaraq, məhkəmənin qərarı ilə doqquz il azadlıqdan mərhum edilib. Ədliyyə Nazirliyinin Penitensiar Xidmətinin Qobustan həbsxanasında cəzasını çəkən həmin şəxs bu ilin mart ayında azadlığa çıxıb.
Məlumatda o da əlavə edilir ki, hər iki şəxs aralarında baş verən insidetlə bağlı əvvələr hüquq -mühafizə orqanlarına müraciətlər ediblər.
Binəqədi rayon Prokurorluğundan hadisə ilə bağlı ətraflı məlumat verməyiblər.
Hadisəni törədən şəxsin tutulması üçün polis əməkdaşları tərəfindən əməliyyat - axtarış tədbirləri davam etdirilir.
Faktla bağlı Binəqədi rayon Prokurorluğunda Azərbaycan Cinayət Məcəlləsinin qəsdən adam öldürmə, yəni digər şəxsi qəsdən həyatdan məhrum etmə (120.1-ci) maddəsi ilə cinayət işi başlanılıb, istintaq aparılır.
Məqalə müəllifi ilə əlaqə ünvanı:[email protected]
