Azərbaycan, Bakı, 07 noyabr / Trend , müxbir C.Babayeva/ Azərbaycanın müxalif Vətəndaş Həmrəyliyi Partiyası (VHP) qarşıdan gələn seçkilər ərəfəsində müxalifət partiyalarının mövqelərinin yaxınlaşacağını mümkün hesab edir.
"Azərbaycanda proporsional seçki sistemi olmadığına görə, müxalifətin qarşıdan gələn seçkilərə vahid siyahı ilə getməsi mümkün deyil. Müxalifət partiyaları seçkilərdə hər dairədə bir müxalif namizədin irəli sürülməsilə bağlı razılığa gələ bilsələr və ona müxalifət düşərgəsindən alternativ irəli sürülməsə, hamı onu müdafiə etsə, bunun böyük uğuru ola bilər", - VHP sədri Sabir Rüstəmxanlı cümə günü Trend -a bildirib.
Trend - un arayışı: Azərbaycanda bələdiyyə seçkisi gələn il, parlament seçkisi 2010 - cu ildə keçiriləcək.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiyası və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisinin nəticələrini tanımamaq barədə birgə bəyanat imzalayıblar. Seçkidən sonra müxalifətin daha geniş koalisiyada birləşməsi istiqamətində danışıqlar başlayıb. Lakin qarşılıqlı ittihamlar üzündən hələ ki, müxalifətin geniş koalisiyasının yaranması baş tutmur.
Rüstəmxanlı sədri olduğu partiyanın bundan sonra da müxalifət düşərgəsində birliyə nail olmaq istiqamətində səylərini əsirgəməyəcəyini bildirib. "Müxalifət daxilində dialoqa və normal iş birliyinə həmişə çalışmışıq. Müxalifət partiyaların arasında birliyin olmasının ilk təşəbbüskarlarından olmuşuq", - deyə VHP sədri bildirib.
Məqalə müəllifi ilə əlaqə saxlamaq üçün ünvan: [email protected]