Azərbaycan, Bakı, 06 dekabr / Trend , müxbir K.Zərbalıyeva/ Azərbaycandakı N saylı hərbi hissədə baş vermiş yanğınla bağlı Müdafiə Nazirliyi rəsmi məlumat yayıb.
Şənbə günü Müdafiə Nazirliyinin mətbuat xidmətindən Trend - a verilən məlumata görə, Ağcabədidə yerləşən hərbi hissəsində dekabrın 4 - dən 5 - nə keçən gecə yanğın baş verib.
Əsgər kazarmasında başlayan yanğın nəticəsində Gəncənin Nizami rayon hərbi komissarlığından bu ilin yanvarında hərbi xidmətə çağrılmış Abdullayev Samir Rafiq oğlu həlak olub.
Yanğında 4 əsgər xəsarət alıb. Onlardan biri hərbi hissənin tibb məntəqəsinə, üçü isə Beyləqandakı hospitala yeləşdirilib.
Nazirliyin mətbuat xidməti yanğının səbəbinin hələlik bəlli olmadığını bildirib.
Respublika Hərbi Prokurorluğundan Trend -a bildirilib ki, Qarabağ hərbi prokurorluğunda Cinayət Məcəlləsinin qulluğa səhlənkar yanaşma (342.2) maddəsi ilə cinayət işi açılıb.
Trend - a daxil olan məlumata görə, yanğına əsgərlərdən birinin yanacaq sobasına yanacaq tökərkən yıxılması və yanacağın sobanın üstünə və ətrafa dağılması səbəb olub.
Məqalə müəllifi ilə əlaqə ünvanı:[email protected]