Azərbaycan, Bakı, 13 fevral / Trend , müxbir E.Rüstəmov/ Venesiya komissiyası Azərbaycanın siyasi partiyalarının maliyyələşdirilməsi məsələsinin yeni variantlarını hazırlaya bilər.
"Bir sıra parametrləri ortaya qoymaq və bunun uğurlu variant olub-olmamasını bildirmək üçün əlimizdə bir mətnin olmasına ehtiyac var, ancaq biz hələ də Azərbaycan tərəfindən "Siyasi partiyalar haqqında" qanuna dəyişikliklər layihəsini almamışıq", - cümə günü Trend -a Avropa Şurasının Venesiya komissiyasının nümayəndəsi Sergey Kuznetsov, Strasburqdan telefonla bildirib.
Azərbaycanda 52 partiya Ədliyyə Nazirliyində dövlət qeydiyyatından keçib. Azərbaycanın "Siyasi partiyalar haqqında" qanun 1992-ci ildə qəbul edilib. İndiyə qədər qanuna heç bir düzəliş və əlavələr edilməyib. Qanuna dəyişiklik əsasən siyasi partiyaların dövlət büdcəsindən maliyyələşdirilməsini nəzərdə tutur.
Müxalifət dövlətə qeydiyyatdan keçmiş bütün partiyaları maliyyələşdirməyi təklif edir. Ancaq Azərbaycan höküməti maliyyələşmə zamanı parlament seçkilərində iştirak etmiş və qanunverici orqanda ən çox yer almış partiyalara üstünlük verilməsi mövqeyindən çıxış edir.
"Siyasi partiyaların dövlət tərəfindən maliyyələşdirilməsinin bütün formaları gözdən keçirilməni tələb edir. Bu məsələ həm Milli Məclisdə, həm də cəmiyyətdə müzakirə edilməlidir. Məsələnin parlamentdəki müzakirəsi zamanı ən adekvat və optimal variantlar seçiləcək və müasir dünyanın tələbləri nəzərə alınacaq", - bir müddət əvvəl Trend -a, Prezidentin İcra Aparatının ictimai-siyasi şöbəsinin rəhbəri Əli Həsənov bildirib.
Həsənovun sözlərinə görə, partiyaların dövlət büdcəsindən maliyyələşdirilməsi onların xarici qrantlardan asılılığını azaldacaq. "Siyasi partiyaların maliyyələşdirilməsi şəffaf olmalıdır. Şəffaflıq bu partiyaları tamamilə kölgədən çıxarır və onların cəmiyyətin aparıcı institutu kimi bərpa olunması şəraitini yaradır. Dünyanın bütün aparıcı ölkələrində bu təcrübədən istifadə olunur. Bu, Azərbaycanda da gözdən keçiriləcək", - Həsənov qeyd edib.
"Siyasi partiyaların maliyyələşdirilməsi problemi Avropa ölkələrinin bir çoxunda yetərincə problematik bir məsələdir", - Kuznetsov hesab edir. Kuznetsovun sözlərinə görə, bu, yetərincə yeni sahədir və onun üzərində yenicə düşünməyə başlayıblar. "Mən daha müfəssəl şəkildə, siyasi partiyaların dövlət vəsaitləri, yaxud özəl qaynaqlardan maliyyələşdirilməsini nəzərdə tuturam. Bu problem Avropa Şurası ölkələrinin çoxunda mövcuddur və hazırda bir çox ölkələr ən yaxşı layihənin axtarışı ilə məşğuldurlar. Ona görə də ən yaxşının hansı olduğunu söyləmək mümkün deyil. Burada həddindən artıq parametrlər var və birmənalı cavab bildirmək mümkün deyil", - Kuznetsov əlavə edib.
Məqalə müəllifi ilə əlaqə ünvanı: [email protected]