Azərbaycan gömrükçüləri narkotik qaçaqmalçılığı ilə məşğul olan bir neçə cinayətkar qrupu zərərsizləşdirib

Azərbaycan, Bakı, 18 iyun / Trend , müxbir K.Zərbalıyeva /

Azərbaycan gömrükçüləri narkotik qaçaqmalçılığı ilə məşğul olan bir neçə cinayətkar qrupu zərərsizləşdirib.

Dövlət Gömrük Komitəsindən cümə günü Trend -a verilən məlumata görə, Astara Gömrük İdarəsinin Sərnişin-Nəqliyyat şöbəsinə İran İslam Respublikası istiqamətindən daxil olan Pakistan İslam Respublikası vətəndaşı Zada Amir Sher oğluna məxsus 2 ədəd çamadanın alt hissəsində, xüsusi qaydada gizlədilmiş gizli saxlanc yerindən polietilen paketlərə qablaşdırılmış ümumi xalis çəkisi 7 kiloqram 40 qram təşkil edən narkotik vasitə - heroin gömrük əməkdaşları tərəfindən aşkar edilərək götürülüb.

İlkin təhqiqat zamanı Zada Amir Sher oğlunun izahatına əsasən, Dövlət Gömrük Komitəsi Gömrük Sahəsində Hüquqpozmalara qarşı Mübarizə Baş İdarəsi Əməliyyat İdarəsinin əməkdaşları tərəfindən keçirilmiş əməliyyat tədbirləri nəticəsində Saray qəsəbəsindən çıxan yolun Bakı-Sumqayıt şossesi ilə kəsişən hissəsində Rəhimova Çinarə Vaqif qızı çamadanları Zada Amir Sher oğlundan təhvil alaraq Rəhimova Gülnarə Vaqif qızının idarə etdiyi "Peugeot 206" markalı, 10 XS 206 dövlət nömrə nişanlı avtomaşına yerləşdirərkən saxlanılıblar.

Eyni zamanda, Rəhimova Çinarə Vaqif qızının izahatına əsasən, yaşadığı Sumqayıt şəhəri, Yaşıldərə qəsəbəsində yerləşən bağ evinə keçirilmiş baxış zamanı Rəhimovanın təqdim etdiyi 2 ədəd üzərində "Bless" sözü əks olunmuş çamadanların içərisində gizlədilmiş 7 ədəd bağlamada cəmi 6 kiloqram 990 qram narkotik vasitə - heroin aşkar edilərək götürülüb.

DGK İstintaq İdarəsində mütəşəkkil dəstə tərəfindən satış məqsədi ilə qanunsuz olaraq narkotik vasitələri külli miqdarda əldə etmə, saxlama, daşıma və gömrük sərhədindən gömrük nəzarətindən gizli keçirmə faktına görə Cinayət Məcəlləsinin 206.4, 234.4.1 və 234.4.3-cü maddələri ilə cinayət işi başlanıb.

Pakistan vətəndaşı Zada Amir Sher oğlu, Azərbaycan vətəndaşları Rəhimova Çinarə Vaqif qızı və Rəhimova Gülnarə Vaqif qızı DGK İstintaq İdarəsi tərəfindən şübhəli şəxs qismində saxlanılıb, Cinayət Məcəlləsinin müvafiq maddələri ilə ittiham elan edilərək Bakı şəhər Yasamal rayon məhkəməsinin qərarı ilə barələrində 3 ay müddətinə həbs qəti imkan tədbiri seçilib.

Hava Nəqliyyatında Baş Gömrük İdarəsinin əməkdaşları tərəfindən isə 6024 saylı "Bakı-Urumçi" aviareysinin sərnişini, Özbəkistan vətəndaşı Sayfilloyeva Manzura Sayfilloyevnanın əl yükünə keçirilmiş baxış zamanı qırmızı rəngli çamadanın içərisində olan 4 ədəd dəri gödəkçənin astarından ümumi çəkisi 2026, 131 qram təşkil edən kustar üsulla hazırlanmış narkotik vasitə-heroin aşkar edilərək götürülüb.

İlkin təhqiqat zamanı Sayfilloyevnanın izahatına əsasən, Dövlət Gömrük Komitəsinin əməkdaşları tərəfindən keçirilmiş əməliyyat tədbirləri nəticəsində Özbəkistan vətəndaşı Khamarayeva Muyiba Muradovna və Pakistan İslam Respublikası vətəndaşı Hamidullah Baxbadşah saxlanılıb.

DGK İstintaq İdarəsində qabaqcadan əlbir olmaqla satış məqsədi ilə qanunsuz olaraq narkotik vasitələri külli miqdarda əldə etmə, saxlama, daşıma və gömrük nəzarətindən gizlətməklə Azərbaycan Respublikasının gömrük sərhədindən keçirilməsi faktına görə Cinayət Məcəlləsinin 206.3.2, 234.4.1 və 234.4.3-cü maddələri ilə cinayət işi başlanıb.

Aparılmış ibtidai istintaq zamanı məlum olub ki, Özbəkistan vətəndaşı Sayfilloyeva həmyerlisi Khamarayeva Muyiba Muradovna və Pakistan vətəndaşı Hamidullah Baxbadşah ilə qabaqcadan əlbir olub cinayət əlaqəsinə girərək "Nizami" metrostansiyasının qarşısında Pakistanın istintaqa məlum olmayan vətəndaşından satış məqsədi ilə 2026, 131 qram çəkidə kustar üsulla hazırlanmış heroini qəbul edərək gömrük sərhədindən gömrük nəzarətindən gizli keçirməyə cəhd göstəriblər.

Həmin şəxslər DGK İstintaq İdarəsi tərəfindən şübhəli şəxs qismində saxlanılıb, Cinayət Məcəlləsinin müvafiq maddələri ilə ittiham elan edilərək Bakı şəhər Yasamal rayon məhkəməsinin qərarı ilə barələrində 3 ay müddətinə həbs qəti imkan tədbiri seçilib.

Astara Gömrük İdarəsinin Sərnişin-Nəqliyyat şöbəsinin gömrük yoxlama xəttində Azərbaycan vətəndaşı Moqbaliyev Seyfulla Eynulla oğlunun idarə etdiyi "DAF" markalı, 20 BU 543 dövlət nömrə nişanlı sərnişin avtobusuna keçirilmiş gömrük baxışı zamanı arxa baqajın, hava təmizləyici sistemin borusunun içərisində, salonun, sipərin altında və avtobusun arxa hissəsində, çərçivəyə bağlanmış hava balonunun içərisində gizlədilmiş 20 ədəd bağlamada 22, 055 kq narkotik vasitə-həşiş qətranı və 12 ədəd bağlamada 12, 155 kq narkotik vasitə-tiryək aşkar olunaraq götürülüb.

Fakt üzrə DGK İstintaq İdarəsində Cinayət Məcəlləsinin 206.3.2, 234.4.1 və 234.4.3-cü maddələri ilə cinayət işi başlanıb.

Keçirilmiş istintaq əməliyyat tədbirləri nəticəsində İran İslam Respublikasının vətəndaşı Qulamrza Rəhman oğlu Ajori respublika ərazisini tərk etmək istəyərkən gömrük əməkdaşları tərəfindən saxlanılıb. 

Həmin şəxslər DGK İstintaq İdarəsi tərəfindən şübhəli şəxs qismində saxlanılıb, Cinayət Məcəlləsinin müvafiq maddələri ilə ittiham elan edilərək Bakı şəhər Yasamal rayon məhkəməsinin qərarı ilə barələrində 3 ay müddətinə həbs qəti imkan tədbiri seçilib.

Hazırda mütəşəkkil cinayətkar dəstələrin digər üzvlərinin müəyyən olunması istiqamətində istintaq tədbirləri davam etdirilir.