Azərbaycan, Bakı, 01 iyul / Trend , müxbir C.Babayeva /
Azərbaycanın müxalifyönlü Müasir Müsavat Partiyasının (MMP) bəzi rayon təşkilatları partiyanın sıralarından istefa verə bilərlər.
"Partiyanın siyasi proqramına dəyişikliklər rayon təşkilatlarında müzakirə olunur. Dəyişikliklərlə tanış olan 13 rayon təşkilatı daha radikal mövqe tutmağımızı tələb edir. Onlar ölkədə baş verən neqativ hallara qarşı mübarizənin gücləndirilməsi və radikal müxalifət partiyaları ilə əməkdaşlıq etməyi təklif edirlər. Təklifləri qəbul edilməyəcəyi təqdirdə rayon təşkilatları partiyadan istefa verib daha radikal müxalifət partiyalara qoşulacaqlarını bildiriblər", - çərşənbə günü Trend -a MMP sədri Hafiz Hacıyev bildirib.
Trend -un arayışı: Hafiz Hacıyev 1992-93-cü illərdə "Azərbalıq" Dövlət Konserninin sədri olub. 2000-ci ildə Müasir Müsavat Partiyasını təsis edib, partiya 2002-ci ildə dövlət qeydiyyatından keçib. Ötən il keçirilən prezident seçkisində Hacıyev 0,65 faiz səs toplayıb. Müasir Müsavat Partiyası özünü iqtidara qarşı konstruktiv müxalifət hesab edirdi.
MMP iyunda Siyasi Şuranın iclasında partiyanın proqramına siyasi mövqe ilə bağlı dəyişiklikləri qəbul etmək niyyətində idi.
Hacıyevin sözlərinə görə, həmin rayon təşkilatlarının narazılıqlarına görə, partiyanın proqramına dəyişiklik edilməsi gecikir. "Partiya həddindən artıq radikal mövqe tutmaq niyyətində deyil. Partiyanın proqramına qəbul olunacaq dəyişikliklərin Siyasi Şuranın iclasında təsdiq olunması iyulun birinci ongünlüyünə planlaşdırılır", - MMP sədri deyib.
O bildirib ki, partiyanın digər rayon təşkilatları da narazılıq bildirən 13 rayon təşkilatına qoşulmaq istəyindədirlər. "Bununla əlaqədar partiyanın rəhbər orqanları çətin vəziyyətə düşüb. Partiyanın rayon təşkilatlarına təpki göstərə bilməsək də, onlarla görüşüb müzakirələrin aparılması nəzərdə tutulub", - Hacıyev deyib.
Məqalə müəllifi ilə əlaqə ünvanı: [email protected]
