Azərbaycan, Bakı, 02 iyul / Trend , müxbir A.Hüseynbala /
Türkdilli Dövlətlərin Parlament Assambleyasının Bakıda keçiriləcək sammitində qurumun ortaq televiziya kanalının yaradılması məsələsi qaldırılacaq.
"Parlament yanında belə bir televiziyanın fəaliyyət göstərməsi daha effektli ola bilər. Çünki türk dövlətlərinin qarşılıqlı əlaqələrini obyektiv təmin edəcək başqa bir qurum təsəvvür etmək çətindir", - cümə axşamı Trend -a Azərbaycan-Türkiyə Parlamentlərarası Əlaqələr üzrə İşçi Qrupun həmsədri Nizami Cəfərov bildirib.
Trend -un arayışı: Ötən il İstanbulda keçirilən türkdilli dövlətlərin parlament başçıları konfransı çərçivəsində Azərbaycan, Qazaxıstan, Qırğızıstan və Türkiyənin daxil olduğu türkdilli dövlətlərin Parlament Assambleyasının təsis edilməsi barədə razılıq əldə olunub. Tədbirdə Özbəkistan və Türkmənistan iştirakdan imtina edib.
Cəfərovun sözlərinə görə, bir müddət əvvəl fəaliyyətə başlayan TRT "Avaz" o qədər də ortaq televiziya kanalı deyil.
"İndi bu kanal yalnız Azərbaycanın İctimai Televiziya və Radio Yayımı Şirkəti ilə əməkdaşlıq edir, ortaq proqramlar hazırlanır. Bu, TRT-nin tabeçiliyindədir, nə qədər qarşılıqlı ələqələr olsa da, əsas işi onlar özləri görürlər", - millət vəkili əlavə edib.
Məqalə müəllifi ilə əlaqə ünvanı: [email protected]