Azərbaycan, Bakı, 26 avqust / Trend , müxbir A.Hüseynbala /
Azərbaycanın müxalifət partiyasında parlamentə təqdim edilmək üçün qanun layihələri hazırlanır.
Azərbaycanın müxalifət partiyasının sədri olan millət vəkili parlamentin payız sessiyasında bəzi qanunlara əlavə və dəyişikliklərin edilməsi, eləcə də bir neçə yeni qanun layihəsinin müzakirəyə çıxarılması təşəbbüsü ilə çıxılş edəcək.
"Partiyanın müvafiq qurumlarında hazırda yeni qanun layihələri hazırlanır, proses sentyabrın 15-nə qədər başa çatacaq", - çərşənbə günü Trend -a Ümid Partiyasının sədri, millət vəkili İqbal Ağazadə bildirib.
Trеnd Nеws-un аrаyışı: Müхаlifəti təmsil еdən Ümid Pаrtiyаsı 1993-cü ildə yаrаdılıb. 2002-ci ildə Vətəndаş Birliyi Pаrtiyаsı (VBP) Ümid Pаriyаsınа birləşib. VBP-nin sədri оlmuş İqbаl Аğаzаdə Ümid Pаrtiyаsınа sədr sеçilib. Аğаzаdə Milli Məclisin dеputаtıdır.
Ağazadənin sözlərinə görə, onun rəhbərlik etdiyi partiya ilk növbədə "Bələdiyyələrin statusu haqqında" qanuna bir sıra əlavə və dəyişikliklərin edilməsinin tərəfdarıdır. "Parlamentin yaz sessiyasında bələdiyyələrin birləşdirilməsini nəzərdə tutan qanun layihəsi qəbul olundu. Bu, bələdiyyələrin daha çevik quruma çevrilməsi üçün önəmli addım idi. Lakin bələdiyyələrin icra strukturlarından asılılığı hələ də qalır", - millət vəkili əlavə edib.
Partiya sədri deyib ki, bələdiyyələrin daha müstəqil fəaliyyəti üçün onların statusunun artırılmasına ciddi ehtiyac var. "Biz "Siyasi partiyalar haqqında" qanuna da bir neçə zəruri əlavə və dəyişikliyin edilməsini istəyirik. Bundan başqa, Seçki Məcəlləsinə əlavə və dəyişikliklərlə də bağlı təkliflərimiz olacaq", - Ağazadə vurğulayıb.
Millət vəkili növbəti sessiyada bir daha vətəndaşların mülkiyyət hüquqlarının qorunması ilə bağlı müvafiq qanunvericiliyə dəyişiklikləri nəzərdə tutan layihənin parlamentin müzakirəsinə çıxarılmasına cəhd göstərəcəklərini deyib.
Məqalə müəllifi ilə əlaqə ünvanı: [email protected]