Azərbaycan, Bakı, 09 noyabr / Trend , muxbir A.Hüseynbala/
Azərbaycanın müxalifət partiyası bələdiyyə üzvlüyünə namizədlərin təzyiqlərlə üzləşdiyini iddia edir.
"Bir neçə gündür ki, yerlərdə partiyanın bələdiyyə seçkilərində iştirak etmək üçün namizədliyini irəli sürən üzvlərə qarşı hərtərəfli təzyiq və təqiblər başlanıb. Ağcabədi və Neftçala rayonlarında bütün sənədlərin dairə seçki komissiyalarına altı gün bundan əvvəl təqdim olunmasına baxmayaraq, hələ də müsavatçılara imza vərəqələri verilməyib", - Trend -un məlumatına görə, bazar ertəsi Müsavat Partiyasının qəbul etdiyi bəyanatda bildirilir.
Trend -un arayışı: Azərbaycanda bələdiyyə seçkisi dekabrın 23-də keçiriləcək. 1718 bələdiyyəyə 15682 bələdiyyə üzvünün seçilməsi nəzərdə tutulur.
Azərbaycanda bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Sənəddə qeyd edilir ki, Tərtər rayon İcra Hakimiyyətinin, Təhsil Şöbəsinin işçiləri və digər vəzifəli şəxslər Müsavatdan olan namizədlərə və onların yaxınlarına təzyiq göstərərək namizədliklərini geri götürməyi tələb ediblər. "Eyni problemlər Beyləqan, Sabirabad, Zaqatala, İsmayıllı və Dəvəçi rayonlarında da var. Bundan əlavə, seçkilərin gərgin dövrü olmasına baxmayaraq, Mərkəzi Seçki Komissiyası çox nadir hallarda iclaslar keçirir, bazar günləri isə orada heç kimi tapmaq mümkün olmur", - partiya bəyan edib.
Müsavat bütün bunları Seçki Məcəlləsinin kobud şəkildə pozulması kimi qiymətləndirir. "Hakimiyyət yenə də öz ənənəsinə sadiq qalaraq təqib, təzyiq, hədə-qorxu və şantaj üsulu ilə partiyanın namizədlərini seçki prosesindən uzaqlaşdırmaq istəyir. Bu faktların müxtəlif rayonlarda baş verməsi göstərir ki, əslində təqib və təzyiqlər yalnız yerli rəhbərlərin yox, həm də yuxarıların sanksiyası ilə həyata keçirilir. Müsavat bütün bunlara özünün qəti etirazını bildirir və bu özbaşınalıqlara son qoyulmasını tələb edir", - bəyanatda qeyd edilir.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan Pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]