Azərbaycan, Bakı, 09 dekabr / Trend , muxbir K.Zərbalıyeva/ Azərbaycanlı generalın qətlində təqsirli bilinən şəxsin həbs müddəti uzadılıb.
Baş Prokurorluğun mətbuat xidmətinin rəhbəri Eldar Sultanov çərşənbə günü Trend -a bildirib ki, Nəsimi rayon məhkəməsinin qərarı ilə müdafiə nazirinin keçmiş müavini, Hərbi Hava Qüvvələri və Hava Hücumundan Müdafiə Qoşunlarının sabiq komandanı, general-leytenant Rail Rzayevin köməkçisi Aydın Rəfiyevin oğlu Anar Rəfiyevin barəsində seçilmiş həbs-qətimkan tədbirinin müddəti daha üç ay uzadılıb.
Rzayev fevralın 11-də, saat 07.30 radələrində Yasamal rayonu, İnşaatçılar prospekti, 533-cü məhəllədəki evindən 300-400 metr aralıda, İsmayıl bəy Qutqaşınlı küçəsindəki 172 saylı orta məktəbin yaxınlığında odlu silahdan açılan bir atəşlə qətlə yetirilib. Qətllə bağlı Respublika Hərbi Prokurorluğu tərəfindən CM-in tamah məqsədilə və ya sifarişlə, habelə zərərçəkmiş şəxsin orqanlarından və toxumalarından istifadə etmə məqsədilə adam öldürmə (120.2.5) və qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə (228-ci) maddələri ilə cinayət işi başlanıb.
Baş prokuror Zakir Qaralov bir müddət öncə mətbuata açıqlamasında bildirib ki, Rzayevin qətl hadisəsi ilə bağlı onun köməkçisi Aydın Rəfiyev, yaveri Anar Həşimov və hərbi hissələrin bəzi əməkdaşları cinayət məsuliyyətinə cəlb edilib.
Qaralov deyib ki, generalın ölümündən dərhal sonra onun iş otağına müdaxilə olunub, bəzi maddi əşyalar oğurlanıb. "Bu cinayətin gizlədilməsi və ört-basdır edilməsi istiqamətində Aydın Rəfiyev başda olmaqla işlər görülüb. Onlar bu cinayətə görə məsuliyyətə cəlb olunub. İstisna etmirik ki, onun bu cinayətdə iştirakı hər hansı bir formada mövcuddur", - baş prokuror əlavə edib.
Qaralov cinayətin işinin açılması üçün beynəlxalq ekspertlər cəlb edildiyini və mürəkkəb ekspertizaların həyata keçirildiyini bildirmişdi.
Məqalə müəllifi ilə əlaqə ünvanı: [email protected]