Azərbaycan, Bakı, 15 fevral / Trend , müxbir A.Hüseynbala/
Azərbaycanın hakimiyyətyönlü partiyasının sədri deputatlığa namizədliyini irəli sürməyəcək.
"Partiyamız paralment seçkilərində iştirak etsə də, mən deputatlığa namizədliyimi irəli sürmək niyyətində deyiləm", - bazar ertəsi Trend -a Demokratik Azərbaycan Dünyası Partiyasının (DADP) sədri Məmməd Əlizadə bildirib.
Trend -un arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Əlizadənin sözlərinə görə, deputatlığa namizədliyini irəli sürməməsinin əsas səbəbi bu şansı gənclərə vermək niyyəti ilə bağlıdır. "Mən yaşlı adamam, parlamentdə gənclərin çoxluq təşkil etməsi nəticəsində qanunverici orqanın daha yüksək səviyyədə fəaliyyətinə nail olmaq mümkündür", - partiya sədri əlavə edib.
DADP sədri deyib ki, özü namizədliyini irəli sürməsə də, partiya parlament seçkilərində fəal iştirak edəcək. "Ən azı 70 dairədən namizəd irəli sürmək fikrimiz var. Hazırda namizədlərin seçimi aparılır. Mart ayında siyahını tam dəqiqləşdirəcəyik", - Əlizadə vurğulayıb.
Hakimiyyətyönlü Demokratik Azərbaycan Dünyası Partiyası (DADP) 1992-ci ildə təsis olunub və 1993-cü ildə Ədliyyə Nazirliyi tərəfindən dövlət qeydiyyatına alınıb. Təşkilata Məmməd Əlizadə rəhbərlik edir. Partiya 1993-cü ildə hakimiyyətə gələn Yeni Azərbaycan Partiyasının siyasətini dəstəkləyir.
Məqalə müəllifi ilə əlaqə ünvanı: [email protected]
