Azərbaycan, Bakı, 1 iyul /Trend, müxbir T.Hacıyev/
Azərbaycanın müxalif Müsavat Partiyasında cümə günü müşavirə keçiriləcək. Bu barədə Trend-ə Müsavat Partiyası gənclər təşkilatının sədri Tural Abbaslı bildirib. Onun sözlərinə görə, müşavirədə partiya başqanı İsa Qəmbərlə yanaşı, mitinq komitəsinin üzvləri də iştirak edəcəklər. İyulun 3-də keçiriləcək mitinqlə bağlı məsləhətləşmələr aparılacaq. Abbaslının bildirdiyinə görə, tədbirdə Demokratiya Uğrunda İttifaqın (DUİ) nümayəndələrinin iştirakı da gözlənilir.
Müsavat Partiyası 1911-ci ilin oktyabrında Bakıda yaradılıb. 1918-ci il mayın 28-də Tiflisdə Müsavat Partiyası bir neçə azsaylı partiya ilə birgə Azərbaycanın istiqlalını elan edib. 1920-ci ilin aprelində Azərbaycan Sovet qoşunları tərəfindən işğal olunduqdan sonra, Müsavat Partiyasının fəaliyyəti məhdudlaşıb və gizli fəaliyyət göstərməyə başlayıb.
1992-ci ilin noyabrında Müsavat Partiyasının III Bərpa Qurultayı keçirilib və İsa Qəmbər partiyanın başqanı seçilib.