Azərbaycan, Bakı, 15 noyabr /Trend/
Rusiya Prezidenti Dmitri Medvedev noyabrın 18-də Xəzəryanı ölkələrin dövlət başçılarının Bakıda keçiriləcək sammitində iştirak edəcək. Bu barədə Kremlin mətbuat xidməti məlumat yayıb.
Sammit beş Xəzəryanı ölkənin - Azərbaycan, Rusiya, İran, Qazaxıstan və Türkmənistan rəhbərlərinin iştirakı ilə keçiriləcək.
Bakı sammitində Xəzərdə təhlükəsizlik sahəsində əməkdaşlığa dair sazişin imzalanacağı gözlənilir.
Noyabrın 3-4-də Bakıda beş Xəzəryanı ölkənin xarici işlər nazirləri müavinlərinin Xəzərdə təhlükəsizlik sahəsində əməkdaşlığa dair saziş layihəsinin razılaşdırılması üzrə iclası keçirilib.
Xəzəryanı dövlətlər 2003-cü ilin noyabrında Xəzərdə dəniz mühitinin qorunması üzrə Çərçivə Konvensiyasını imzalayıblar.
1998-ci ilin iyulunda Qazaxıstanla Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.