Azərbaycan, Bakı, 3 dekabr /Trend, müxbir T.Hacıyev/
Azərbaycanın müxalif Vətəndaş və İnkişaf Partiyasının (VİP) sədri Əli Əliyev partiyanın seçkili qurumlarında dəyişikliklər olunmasının tərəfdarıdır. Bu barədə cümə gün Trend-ə VİP sədri Əli Əliyev bildirib.
Onun sözlərinə görə, gələn həftənin bazar ertəsi seçkilərdən sonra ilk siyasi şura iclası keçiriləcək, şurada noyabrın 7-də keçirilmiş parlament seçkilərinin nəticələri müzakirə olunacaq və müvafiq qərarlar qəbul ediləcək.
Əliyev deyib ki, partiyada qurultay çağırılması ilə bağlı təkliflər var: "Şura iclasında partiyanın seçkili qurumlarının tərkibində dəyişiklik edilməsi barədə qərarlar qəbul olunacaq. Bundan əlavə, müvafiq qərar qəbul ediləcəyi təqdirdə, 2011-ci ilin yaz aylarında qurultay çağırılacaq", - Əliyev deyib.
Azərbaycanda noyabrın 7-də parlament seçkiləri keçirilib.
Səsvermədə seçicilərin 50,14 faizi (2480205 seçici) iştirak edib. Seçkilərdə 690 namizəd mandate almaq uğrunda mübarizə aparıb.
Azərbaycanda parlament seçkiləri majoritar sistem üzrə 125 seçki dairəsində aparılır. Bundan əvvəlki seçkilər 2005-ci ilin noyabr ayında keçirilib.
